DILI, 06 janeiru 2023 (TATOLI)—Xefe suku Wenunuk, postu administrativu Metinaro, munisípiu Dili, Simão Mendonça, dehan, tinan-tinan udan ne’e mota Wenunuk, Wekura no mota Wemeta sempre fó risku ba komunidade iha Metinaro.
“Iha ha’u-nia suku rasik mota Wenunuk ne’e presiza halo moru protesaun para bele asegura no salva komunidade Wenunuk hosi inundasaun ne’ebé impaktu hosi udan no anin,” Xefe suku ne’e hateten ba Agência Tatoli, iha Metinaro, kinta ne’e.
Tuir nia, komunidade ne’ebé sei afeta hosi mota ne’e xefe família besik 40 inklui sede suku no eskola públiku ida.
Tanba ne’e, liuhosi biban ne’e nia husu Governu atu orsamentu 2023 mós fó ba asuntu ne’e, nune’e bele salva komunidade hosi inundasaun tanba kada tinan mota sempre fó impaktu ba komunidade.
Nune’e, nia dehan, parseiru no Governu apoiu aihan ne’e la signifika rezolve problema povu maibé hakarak Governu mai haree hodi tau bronjon nune’e bele proteje komunidade hosi udan no inundasaun.
Jornalista : Osória Marques
Editór : Cancio Ximenes
