OÉ-CUSSE, 07 janeiru 2023 (TATOLI)–Organizasaun Persaudaraan Setia Hati Terate (PSHT) hosi Rejiaun Administrativa Espesiál Oé-cusse Ambeno (RAEOA), sesta (07/01), realiza natál no tinan foun entre membru sira hodi hametin liután unidade no fraternidade.
PSHT Oé-cusse konvida autoridade rejiaun, parte seguransa no defeza, autoridade komunitáriu no organizasaun sira hanesan IKS, KORKA, Taekwondo no seluk tan.
“Ami hakarak konvida ita hotu hodi selebra natál no tinan foun hamutuk hodi hametin liután lasu fraternidade no hato’o ami-nia kompromisu forte, oinsa fó nafatin ami-nia kontribuisaun ba pás no dame iha Timor-Leste, espesiálmente iha RAEOA,” Koordenadór PSHT Oé-cusse, Cándido Dos Reis Amaral, hateten iha ámbitu serimónia.
Nia fundamenta, Timor-Leste presiza ambiente hakmatek nune’e ema hotu bele sente hakmatek no deklara posizaun hodi hamutuk ho sosiedade hodi kontribui ba prosesu dezenvolvimentu nasionál.
Notísia relevante: Governu husu membru PSHT kontinua kontribui ba pás no estabilidade
Iha biban ne’e, Adjuntu Prezidente Autoridade RAEOA, Maximiano Neno, informa, objetivu sorumutuk ho PSHT atu halo avaliasaun serbisu ba lala’ok organizasaun durante tinan-ida nia laran.
“Asuntu tolu mak presiza hanoin ba pasadu, prezente no futuru, pasadu ita liu ona buat a’at di’ak ita simu ho laran luak no agradese, agora prezente ita hamutuk iha ne’e ho saúde di’ak atu kontribui kontinua hametin unidade atu kontribui ba prosesu dezenvolvimentu nasionál liuhosi knaar ida-idak nian, ita atu hateke ba futuru saida mak ita tenke halo, nune’e tulun ita-nia nasaun hala’o programa ba prosesu dezenvolvimentu ne’e di’ak liután iha futuru,” nia fó hanoin.
Prezidente sub-KRAM Oé-cusse, Jeferino da Cruz Salu, agradese ba organizasaun PSHT tanba realiza natál no tinan foun hamutuk hodi avalia progresu ezisténsia iha padokan Oé-cusse hodi hadi’a ba futuru.
“Ha’u hanoin organizasaun seluk mós presiza, primeira véz akontese bainhira ami kaer organizasaun GAM iha Oé-cusse tinan 10 ona,” nia orgullu.
Jeferino da Cruz, konsidera natál hamutuk ne’e iha buat rua importante, dahuluk bele goza tinan foun 2023 no evalua tinan sira liubá inklui 2022.
“Ita bele hateten katak tinan foun 2023 ne’e hanesan tinan transformasaun. Tinan ne’ebé ita hakarak transforma buat sira liubá no saida mak atu lori ba oin, ohin kalan ita hamutuk iha ne’e atu halo evaluasaun kona-ba vantajen saida mak ita atu halo no desvantajen saida mak ita husik hela, agora ita tenke transforma didi’ak loron aban nian atu hadi’a,” nia afirma.
Totál membru organizasaun PSHT iha Oé-cusse hamutuk na’in-700.
Jornalista : Abílio Elo Nini
Editora : Julia Chatarina
