BAUCAU, 10 janeiru 2023 (TATOLI) – Sekretariadu Tékniku Administrasaun Eleitorál (STAE) tersa ne’e, realiza termu entrega hodi subtitui kargu diretór sesante Lúcio Freitas Salvador ba diretór interinu foun Natividade Freitas Guterres iha munisípiu Baucau.
Desizaun refere fó-sai hosi Komisaun Funsaun Publiku (CFP, sigla portugés) númeru 5259/2022/Prezidente Komisaun Funsaun Públika, ne’ebé iha redasaun hateten konsidera informasaun aprezenta hosi Ministeiru Admistrasaun Estatal (MAE) númeru 538/DN/MAE/2022 iha loron 23 dezembru ne’ebé trata kargu serbisu iha STAE.
Prezidente KFP uza kompeténsia tuir lei númeru 7/2009, loron 15 juñu kona-ba kriasaun KFP hodi deside hapara kargu diretór sesante hahú loron-31 dezembru 2022 ho naran Lúcio Freitas Salvadór nu’udar tékniku profisionál grau B.
Nune’e nomea Diretór interinu foun Natividade Freitas Guterres nu’udar tekniku profesionál grau B ne’ebé sei lidera hahú iha loron 01 janeiru to’o 30 juñu 2023 no sei hala’o selesaun pur-méritu.
Diretór foun STAE Baucau, Natividade Freitas Guterres, agradese tanba hetan konfiansa nu’udar dirijenti foun iha STAE Baucau no prontu atu serbisu inklui akumula funsionáriu hotu hodi fó susesu instituisaun.
“Ha’u sei hamriik iha oin atu hatudu dalan, iha sorin sei kaer imi hotu-nia liman atu la’o hamutuk no iha hamriik iha kotuk atu dudu ba oin hodi apoia malu,” Diretór foun STAE Baucau hateten iha Vila Nova, tersa ne’e.
Natividade Guterres promete sei hamutuk ho diretór sesante hadi’a serbisu hotu inklui hametin ekipa atu sai forsa liután hasoru eventu festa demokrasia eleisaun parlamentár tinan 2023.
Diretór sesante, Lúcio Freitas Salvadór, prontu atu kolabora no ajuda diretór foun tuir kapasidade inklui esperiénsia tuir nesesidade.
“Ha’u sempre sei ajuda laiha rezerva, nu’udar Baucau oan prontu kontribui tanba prosesu demokrasia presiza órgaun eleitorál mak hala’o presiza rekursu umanu tanba ne’e ami tenke apoia malu,” Lúcio Salvadór akresenta.
Lúcio Salvadór rekomenda atu STAE nasionál tenke hadi’a sistema instituisaun hodi halakon interese pesoál iha institusaun ne’ebé harii hosi saudozu sira.
Nune’e mós halo rekrutamentu brigadista tenke selesaun iha munisípiu Baucau tanba Baucau sai barometru iha eleisaun parlamentár mai nune’e presiza funsionáriu tékniku ne’ebé iha koñesementu tuir área geografia Baucau nian.
Iha serimónia ne’e, Diretór sesante entrega patrimóniu estadu hanesan karreta operasionál ida, karimbu, dokumentu relatóriu eleisaun hotu, rádiu komunikasaun ida, motorizada rua no dokumentu rai no uma STAE Baucau.
Serimónia termu entrega refere partisipa hosi Diretór Jerál Nasionál STAE, Leonardo Amaral, Reprezentante Autoridade Munisipál Baucau, Bernardo Neto, Diretór CNE Baucau, Esmeraldo Damião Belo no funsionáriu STAE Baucau.
Jornalista : Natalino Belo
Editór : Evaristo Soares Martins
