MS husu inan aman lori labarik simu vasina hodi hadok hosi moras
DILI, 12 janieru 2023(TATOLI) – Diretór Nasionál Saúde Públika iha Ministériu Saúde, Frederico Bosco, husu ba inan aman sira lori labarik sira tinan lima mai kraik ba simu vasina iha fasilidade saúde ne’ebé mak besik hodi proteje sira nia kondisaun saúde husi moras hotu no salva sira nia moris.
“Husu ba inan aman sira atu aproveita oportunidade ida ne’e hodi lori ita nia oan sira tinan lima mai kraik hodi ba simu vasina iha fasilidade saúde ne’ebé mak besik tanba vasina imunizasaun intregadu PCV, vitamina A, Polio, Sarampu Rubella no Albendazole mak proteje saúde no salva moris”, Frederico Bosco ba TATOLI, ohin.
Nia dehan labarik sira mak inan aman nia ksolok, família nia osan mean no nasaun nia jerasaun kontinuadór sira. Tanba ne’e família nia papél atu proteje sira husi moras.
“Ho nune´e ita kria oportunidade atu sira bele sai bo´ot ho kondisaun saúde di´ak, livre husi moras perigozu sira ne’e, tanba vasina ita nia oan hanesan aktu atu hatudu inan aman nia domin ba sira nia oan sira”, refere.
Labarik sira ne’ebé la vasina sira sei la hetan protesaun no sai vulnerável ba moras sira hanesan sarampo rubella, polio, no fasíl sofre moras infesaun respiratóriu baixa kauza husi batéria Pneumocócica. Komplikasaun husi polio ida mak labarik bele sai defisiente no hamosu problema ba inan aman.
“Labarik sira hetan vasina hotu, nasaun tomak hetan protesaun. Maibé labarik barak la vasina, ita nia nasaun mos sei sai vulnerável ba moras sira ne’e”, afirma.
Frederico Bosco subliña atividade kampaña ida ne’e hala´o iha postu vasinasaun ne’ebé defini husi kada sentru saúde. Postu vasinasaun mak fasilidade saúde, bele iha sede suku, ka fatin ne’ebé ekipa saúde deside hamutuk ho autoridade lokál sira.
“Hafoin semana haat mak sei iha labarik balun ne’ebé seidauk kompleta vasina, ekipa saúde sei hala´o vizita domisiliária hodi vasina labarik sira tinan lima mai kraik”, revela.
Entertantu kampaña nasionál integradu ida ne’e, hahú iha 12 janeiru no remata iha 28 fevereiru iha teritóriu nasionál.
Notísia relevante : 12 Janeiru : Labarik hamutuk 865.024 simu vasina
Jornalista : Felicidade Ximenes
Editór : Zezito Silva
