DILI, 12 janieru 2023 (TATOLI)—Vise Ministru Solidariedade Sosiál no Inkluzaun (MSSI), Signi Chandrawati Verdial, husu ba emposadu na’in-rua fiskál úniku hosi Instituto para a Defesa dos Direitos da Criança (INDDICA) ho Intituisaun Nasionál Kombate HIV SIDA (INCSIDA) kontribui ba boa-governasaun no ezekusaun orsamentu ba instituisaun rua ne’e nian.
“Ho sira-nia pose ohin bele kontribui liután ba ita-nia boa-governasaun no ezekusaun orsamentu institutu públiku rua ne’e nian,” Signi Verdial hateten ba jornalista sira hafoin fó pose ba fiskál úniku na’in rua hosi Instituisaun HIV SIDA ho Instituto para a Defesa dos Direitos da Criança iha salaun MSSI, Caicoli, kinta ne’e.
Tanba ne’e, nia husu ba fiskál úniku na’in-rua katak halo tuir de’it konstituisaun no lei sira haruka, tanba iha estatutu ne’e dehan sira na’in-rua sei ho mandatu ba tinan haat nia-laran hodi halo servisu liga liu ba halo fisklizasaun ba jestaun finanseira no patrimómiu institutu rua ne’e nian.
“Halo tuir ba konstituisaun no lei sira haruka, ita-nia integridade ita bele sukat enkuantu ema ida la haree. La presiza ema haree ita halo buat di’ak, maibé iha tempu ema la haree ita hakarak buat di’ak ne’e ita tempu ema la haree,” nia dehan.
Pose ba na’in-rua ne’e tanba parte INDDICA refere ba Diploma Konjunta Nú. 01/Gab/MSSI-MF/FU-INDDICA/IX/2022 kona-ba despassu nomeasaun fiskál úniku INDDICA, aprovadu hosi Ministru Finansa no Ministra Solidariedade Sosiál no Inkluzaun, data publikasaun iha Jornal República Serie II. no. 41 loron Sexta-feira, 14 de outubru de 2022, nune’e ami propoin ba Senhorinha Gama da Costa Lobo ba fiskál únika ba INDDICA.
INCSIDA, I.P nu’udar Instituisaun Estadu ne’ebé Governu harii dekretu-lei Nú. 2/2021, 11 de janeiro, atribui responsável hodi define, koordena no apoiu implementasaun estratéjia nasionál no planu asaun ba kombate HIV-SIDA iha Timor-Leste.
Tomada de posse ba Fiskal Úniku, Crijanto Rodrigues, bazea ba dekretu-lei Nú. 2/2021, 11 de janeiru, tuir estatutu INCSIDA, I.P, iha artigu 13 alinea 2.
Jornalista : Osória Marques
Editór : Cancio Ximenes
