BOBONARO, 16 Janeiru 2022 (TATOLI)-Agrikultór suku rua kompostu hosi suku Tapo-Memu no Saburai ne’ebé pertense ba postu administrativu Maliana, Munisípiu Bobonaro ezije ba Ministériu Agrikultura no Peskás (MAP) atu mobliza lalais Ekipamentu Pezadu hodi halo normalizasaun ba Irrigasaun tradisionál Mabil-Gol ne’ebé hetan estragus hafoin akontese udan-boot iha tinan 2022.
Agrikultór suku Saburai, Fernando Lopez hateten, daudaun ne’e natar nai’in sira hahú ona butuk fini ba époka dahuluk tinan 2023 tanba ne’e MAP presiza kumpre promesa ne’ebé antes ne’e dehan iha semana kotuk mobliza ona ekipamentus atu hahú ona halo intervensaun.
Notísia relevante: MAP ke’e ona kanál irrigasaun tradisionál iha Tapo-Memo
“Ami husu favór boot ba iha ministériu, labele nega tiha sira-nia promesa ne’e, favór iha tempu badak mai lalais hadia netik ami-nia irrigasaun ne’e nune’e ami bele moris netik hosi ami-nia natar,” nia informa ba jornalista sira, iha natar parte suku Tapo-Memo, segunda ne’e.
Agrikultór Jefrry Amarál, preokupa tebes ho kondisaun irrigasaun refere tanba daudaun ne’e tama ona époka atu halai natar nian, maibé bainhira MAP la halo intervensaun imediata maka hare fini ne’e daudaun ne’e agrikultor sira butuk ona sei falla totál.
“Foin lalais hosi Ministériu Agrikultura mai haree ona lokasi ne’e dehan atu hatún materiál atu ajuda ami, maibé to’o agora ami la hetan, ne’ebé ami husu ministériu sé bele ajuda netik ami povu ne’ebé susar no terus,” nia tenik.
Diretór Servisu Agrikultura no Peska Munisípiu Bobonaro, Alberto Gomes Lopes, klarifika tuir loloos ekipamentu pezadu mai ona iha semana kotuk, maibé la konsege tanba mangera ne’ebé kanaliza idrólika ba kanuru eskavadór aat.
Tanba ne’e operadór sira halo fali preparasaun no daudaun ne’e tékniku sira iha nasionál konsege konklui ona hala manutensaun ba ekipamentu pezadu refere.
“Hau iha kinta ne’e ba halo konfirmasaun maibé la konsege, depois ohin dadeer ha’u konfirma fila-fali, agora kondisaun preparadu, sira konsege troka hotu ona, ohin sira halo preparasaun kombustível ho trontong, parese data fiksu aban ne’e komesa arranka hosi Dili mai ona,” nia katak.
Notísia relevante: Kompañia lokál finaliza ona normalizasaun ba irrigasaun iha munisípiu
Jornalista : Sérgio da Cruz
Editór : Evaristo Soares Martins
