BOBONARO, 16 janeiru 2023 (TATOLI) – Diretór servisu edukasaun munisípiu Bobonaro, Crispim Lopes Moniz, relata totál estudante na’in-1.259 iha munisípiu refere mak sai mellór klasifikada iha ezame nasionál tinan letivu 2022 hodi sai benefisiáriu asesu bolsa méritu hosi Ministériu Edukasaun, Juventude no Desportu (MEJD).
Notísia relevante: MEJD prevee millaun $7,2 atu atribui ba estudante mellor klasifikada
“Ita iha totál alunu hetan mellor klasifikadu ne’e 1.250, hahú hosi primeiru to’o terseiru, balun hosi kuartu no kintu klasifikadu,” nia informa ba jornalista sira, iha kna’ar-fatin Bairu Maravilha, suku Odomau, segunda ne’e.
Crispim subliña, foin lalais ne’e mosu konfuzaun oituan iha publikasaun primeiru tanba nota ne’e la hán malu ho atendimentu bolsa méritu tanba ida primeiru ne’e nota diploma ‘mista’ ne’ebé kompostu hosi valór ezame primeiru to’o oitavu períodu 50%, depois nota ezame nasionál 50%.
Maibé iha atribuisaun bolsa méritu nível nasionál ne’e haree liu ba valór reál ezame nasionál ne’e rezultadu orijinál hosi korresaun mákina.
Enkuantu ba nível eskolár sira-ne’e mai direitamente hosi profesór sira-ne’ebé akompaña alunu sira durante ne’e bazea ba rezultadu ezame períodika.
“Sira halo enkontru ne’ebé tenke hetan partisipasaun mínimu liu dois tersus hosi profesór sira-ne’ebé mak hanorin iha ne’ebá, sira halo enkontru depois iha akta enkontru, depois bazea ba akta ne’e mak sira rekomenda katak labarik ida-ne’e mak mere hetan mellór, primeiru klasifikadu mak ida-ne’e, segundu klasifikadu mak ida-ne’e to’o kintu lugár,” Crispim haktuir.
Daudaun ne’e MEJD halo ona esforsu atubele halo transferénsia orsamentu ba benifisiáriu sira-nia konta bankária.
“Sira loke konta bankária iha Banku Nasionál Komérsiu Timor-Leste (BNCTL, sigla portugés) depois ida-ne’e sira lori fotokopia konta bankária ne’e mai aprezenta iha-ne’e, servisu edukasaun munisipál rekapitula kedas sira-nia númeru konta bankária hafoin enkamiña ba diresaun nasionál mak sei kontaktu ba BNCTL hodi transfere ba konta idak-idak nian,” Diretór ne’e esklarese.
Tuir nia, subsídiu ne’e hanesan motivasaun ida tanba ne’e apela ba inan-aman sira atu akompaña oan sira estuda maka’as nune’e bele hetan oportunidade hanesan estudante sira seluk
Notísia relevante: Estudante mellór klasifikadu 3.500 sei asesu bolsa méritu iha semana oin
Jornalista : Sérgio da Cruz
Editór : Evaristo Soares Martins
