OÉ-CUSSE, 27 janeiru 2023 (TATOLI) – Iha fulan janeiru 2023, Autoridade RAEOA liuhosi Sekretariu Rejional ba Agrikultura, hamutuk ho autoridade lokál sira kontinua monta estaka 35 ba baliza iha área protejida iha fatin tolu iha sub-rejiaun Pante Makasar no sub-rejiaun Nítibe.
Sekretáriu Rejionál ba Asuntu Agrikultura, José Eta, informa, iha 2022 Autoridade monta ona 25, nune’e iha tinan 2023 kontinua monta tán 35 hodi kompleta ba 60 iha iha área protejida fatin tolu maka hanesan Monte Kutete, Usmetan no Manggal Citrana.
Dirijente Diresaun Agrikultura ne’e, esplika, área protejida fatin tolu ne’e maka hanesan monte Kutete lokaliza iha suku Nipani, Costa, Cunha, Lalisuk no Bobocase pertense ba iha sub-rejiaun Pante Makasar, hamutuk estaka 10.
Nune’e mós área Usmetan lokaliza iha suku Taiboko hamutuk estaka 15, iha sub-rejiaun Nítibe área Mangal Citrana lokaliza iha suku Bene-Ufe hamutuk estaka 10.
“Durante iha prosesu monta estaka ba baliza área protejida sira, ita mós envolve líder komunitáriu sira, hanesan lian-na’in, guarda floresta sira no autoridade seguransa iha kada Suku,” José Eta inform aba Agência Tatoli iha suku Naimeko, sesta ne’e.
Nia afirma, objetivu prinsipál hosi monta estaka sira-ne’e, atu define baliza área protejida sira nune’e bele evita estragu área protejida sira iha futuru.
“Atividade realiza bazea Dekretu-Lei Nú. 5/2016, 16 marsu, kona-bá Sistema Nasional Área Protejida, tanba iha RAEOA área protejida ne’ebé identifikadu hamutuk fatin neen (6) ho totál área protejida hamutuk ektare 35,000 mai hosi monte Kutete, Usmetan, Oebatan, área Mangal Citrana, Monte Manu Leu no Ek-Oni,” nia katak.
Notísia relevante: RAEOA implementa ona lei sistema nasionál área protejida
Jornalista: Abílio Elo Nini
Editór: Evaristo Soares Martins
