iklan

DILI

FOKUPERS rejista kazu violénsia hasoru minoridade hamutuk 14

FOKUPERS rejista kazu violénsia hasoru minoridade hamutuk 14

Diretora Ezekutiva Forum Komunikasaun Feto Timor-Lorosa'e (FOKUPES), Maria Fátima Perreira Guterres. Imajen Tatoli/Francisco Sony

DILI 30 janeiru 2023 (TATOLI)—Diretora Forum Komunikasaun Feto Timor Lorosa’e (FOKUPERS), Maria Fátima Pereira, hateten iha tinan 2022 ne’e FOKUPERS rejista kazu violénsia hasoru labarik minoridade iha Timor-Leste hamutuk 14.

“Kazu violénsia seksuál hasoru labarik iha kazu neen (6), abuzu seksuál ba labarik iha ida (1), insestu ba labarik iha haat (4), asédiu seksuál iha ida (1), violénsia públiku agresivu hasoru labarik iha rua (2),” Diretora Forum Komunikasaun Feto Timor Lorosa’e (FOKUPERS) ne’e hateten ba Agência Tatoli nakait ho selebrasaun loron mundiál ba Labarik iha Dalan Ninin ne’ebé mundu selebra kada 31 janeiru, iha nia kna’ar fatin Palpasu, segunda ne’e.

Entretantu, nia informa, violénsia doméstika númeru aas liu hamutuk 52, violénsia ba labarik iha kazu rua 92), abandona hosi laen kazu 36, abandona hosi namoradu iha kazu lima (5), violénsia seksual ba ema boot iha kazu hitu (7), kazu agresivu fiziku ba ema boot iha hitu (7), ema soe bebé iha ida (1), abortu aforsadu-infantisidu ba bebé iha ida 91), tráfiku humanu iha hitu (7), hadau malu oan iha kazu rua (2) no seluk kona-ba ameasa, burla, la’o la fila ba uma iha haat (4).

Hosi kazu hirak iha leten ne’e, kliente ne’ebé mai mesak hamutuk 27 ne’e refere hosi vítima ka sobrevivente hamutuk haat (4), refere hosi membru FOKUPERS ka staff iha lima (5), refere hosi família kliente iha 30, refere hosi Polisia Unidade Pesoál Vulneravél (VPU), Komunidade Eskuadra Polisia, ho Polisia Servisu Investigasaun Kriminal (PSIK) iha 18, PRADET iha 11, Programa Monitorizasaun Sistema Judisial (JSMP) iha rua (2), Asisténsia Legál ba Feto no Labarik (ALFeLa) iha ualu (8).

Nia dehan, hosi Ministeriu Solidariedade Sosial no Inkluzaun (MSSI) iha rua (2), Rede Referál sira hanesan APJTL Palásiu Prezidensiál Repúblika, Organizasaun Internasionál OXFAM, Uma Pás Baucau, Forum Komunikasaun Juventude (FKJ), The Asia Fundation (TAF), Uniaun Ema ho Difisiensia Matan (ETBU), Asosiasaun Chega ba Ita (ACbit), Komisaun Nasionál Direitu Labarik (KNDL) no Belun iha rua (3).

Refere hosi Rede Feto, Caucus, Alola Fundation, Yayasan Hak hamutuk iha 18, hosi líder komunitariu ida (1), hosi Estudante, Professor, Instituisaun Relijiozu, Hospital, Klinika Motael, Lanud, JUSs, DJ, CNR, KBRI iha ualu (8), hosi viziñu, Taxi, Kolega, LELY, Funsionariu Publiku, Mídia/Jornalista, Bombeirus iha rua (2).

“Entretantu kazu hirak ne’ebé iha ona polísia hamutuk 57, iha Ministériu Públiku hamutuk 11, iha Defensor Publiku hamutuk rua (2), iha Tribunal hamutuk haat (4), kazu sei iha prosesu nia laran hamutuk rua (2), konsultasaun trata dokumentu hamutuk 21, rezolve tuir familia mediasaun (kazu sivil) hamutuk tolu (3), vitima lakohi prosesa nia kazu, laiha informasaun hamutuk 15 no husu ba prosesu ka Kazu seidauk rejistu ba Polisia, Ministériu Públiku no Defensór públiku hamutuk 23,” nia hateten.

Nia dehan, kazu oioin ne’ebé akontese ba ema boot no ba labarik sira-ne’ebé rejistu iha FOKUPERS hamutuk 138 no violénsia doméstika mak numeru aas iha Timor-Leste, hahú hosi fulan-janeiru too novembru ne’e rejistu kazu hamutuk 138.

“Asisténsia ne’ebé ita fó mak liuhosi ofisiál legál sira no kanselór iha selektór (fatin nia naran), entaun depende ba kazu karik. Vítima minoridade sira iha uma mahon ne’e lais liu semana ida no kle’ur liu mak tinan ida-rua maibé depende ba kazu hanesan insestu no violasaun seksuál,” nia dehan.

Nia esplika, kazu insestu ne’e rasik dala ruma aman ka tiu mak halo fali ba nia oan ka subriña sira, ne’e sei lori tempu mak foin iha solusaun tanba suspeitu sei komunidade nia leet, entaun vítima seidauk bele fila tanba vítima presiza iha seguransa tanba sira tauk no trauma hela.

Durante iha uma mahon, nia dehan, sira fó mós edukasaun ba labrik sira liuhosi Ministériu Edukasaun Juventude no Desportu (MEJD) inklui fó formasaun liuhosi uma mahon sira iha Timor-Leste.

“Ita tenke asegura sira no sira sente katak sira sei la lakon sira-nia estudu. Entaun ita nafatin fó oportunidade ba sira atu bele kontinua estuda tanba sira sei idade eskolár,” nia dehan.

Bainhira rekupera, FOKUPERS servisu hamutuk ho rede referál sira iha munisípiu hodi reintegra vítima ba nia família.

Molok reintegra ita sei halo komunikasaun ba nia família, nune’e bainhira reintegra tenke iha seguransa ba nia no asegura, tanba binhira reintegra ba nia família ne’e baibain FOKUPERS halo ona no seidauk iha vítima ida mak lakohi atu fila ba nia família.

“Ita hatene katak uma mahon la’ós fatin hela permanente, entaun bele dehan bainhira kazu rezolvidu ona mak vítima tenke fila ba nia família,” nia hateten.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!