António Barreto hetan konfiansa lidera Komisaun Foos-rai Maliana

BOBONARO, 31 Janeiru 2023 (TATOLI) – Prezidente autoridade munisípiu Bobonaro, Ernesto de Oliveira Barreto, segunda ne’e fó pose ba António Barreto da Conceição ho estrutura ne’ebé hetan konfiansa hosi grupu agrikultór sira sai prezidente Komisaun Foos-Rai Maliana ba mandatu tinan ida.

Konfiansa ne’e agrikultór Maliana depozita ba António da Conceição tanba nia  asume kargu nu’udar Prezidente Sentru Atendimentu Agríkola Kuda-Ulun Bobonaro (CAAKUB, sigla portugés) períodu 2021-2023. Hosi mandatu ne’ebé nia lidera tinan-ida resin konsege hatudu rezultadu servisu di’ak tebes ho grupu agrikultór sira liuhosi projetu foos-rai.

Prezidente autoridade munisípiu Bobonaro, Ernesto de Oliveira Barreto, parabeniza estrutura tomak no husu atu serbisu ho responsabilidade nune’e bele kontinua garante kualidade foos-rai Maliana ba konsumidór sira konsumu.

Notísia relevante: António Barreto lidera CAAKUB periúdu 2021-2023

“Hau hatete tiha ona, serbisu maka’as nafatin, asegura nafatin imajen Bobonaro nian katak foos Bobonaro númeru 1, entaun ita tenke kada, depois kontrola mákina dulas hare, atu nune’e evita mákina ne’e ba dulas ema-nia hare labele ikis hotu, ba faan iha merkadu ema dehan fali foos Maliana la di’ak,” nia informa ba jornalista sira, iha salaun administrasaun Bobonaro hafoin fó pose.

Nia dehan, komisaun presiza motiva agrikultór sira atu nune’e bele mollora serbisu di’ak liután hodi hasa’e kuantidade produsaun hare.

Tanba tuir testa ne’ebé Japan International Cooperation Agency (JICA) halo hatudu katak kualidade foos-rai Maliana okupa númeru dahuluk no tuir kedas Oe-Cuse.

“Ita Agradese ba JICA tanba ohin loron bele hetan naran di’ak foos-rai Bobonaro ne’e kualidade númeru 1 iha Timor-Leste. Uluk ita la hatene foos nia ikis mak ne’ebé, di’ak mak ne’ebé kualidade mak ne’ebé, maibé ita agradese ho prezensa JICA nian, ita bele hatene foos Bobonaro iha kualidade duni,” nia apresia.

Xefe Advisor JICA, Kamiodohzono Akira, informa ne’e tanba serbisu hamutuk ho Ministériu Agrikultura no Peska (MAP) establese komisaun ne’e atu mellora liután kualidade foos-rai Maliana nian.

“Komisaun ne’e atu promove liután foos-rai Maliana, tanba tinan kotuk agrikultór sira konsege faan foos ba SEEKoP no CLN, entaun ami-nia tarjetu Maliana I, bele sai ezemplu ka modelu di’ak ida ba agrikultor sira iha Buluto, Manatuto no Baucau,” nia katak.

Diretór servisu agrikultura munisípiu Bobonaro, Alberto Gomes Lopes, reforsa komisaun ne’e hahú funsiona, tanba ne’e estrutura tomak presiza kria liña koordenasaun di’ak ho parseiru sira, liuliu JICA no tékniku armazein inklui grupu agrikultor sira nune’e bele serbisu tuir idak-idak nia papél hodi asegura kualidade produsaun.

“Ha’u hanoin katak, ho estabelesimentu komisaun ne’e ita sei esforsu liután dezenvolve ita-nia to’os na’in atu rezulta ita-nia produsaun ba terrióriu laran tomak ho kualidade,” nia katak.

Prezidente komisaun foos-rai Maliana, António Barreto da Conceição, agradese na JICA no grupu agrikultór sira-ne’ebé depozita ona komfiansa asume kargu ne’e.

Maibé tuir nia, responsablidade volunatáriu labele la’o ho susesu bainhira la hetan apoia hosi komponente hotu iha munisípiu Bobonaro.

“Ida ne’e buat foun ida mai ha’u, depois ba foos-rai ne’e ha’u-nia koñesimentu ne’e sangat gagah. Ne’e duni presiza ita-boot sira-nia apoiu atu nune’e ba oin ema bele temi nafatin Maliana nia foos iha merkadu kualidade di’ak,” nia hateten.

Entretantu prezensa parseiru JICA liuhosi projetu foos-rai  iha munisípiu Bobonaro durante tinan neen nia laran ba agrikultór irrigasaun Maliana I implementa atividade sira hanesan apoiu asisténsia téknika moderna ba grupu agrikultor suku hitu iha Miliana.

Tuir dadus hosi Ministériu Agrikultura no Peska (MAP) natar iha postu administrativu Maliana iha ektare 7,662. Hosi númeru ne’e iha tinan 2022 área kultiva 5,544 mak ativu ho rezultadu produsaun kada ektare tonelada haat.

Tinan ne’e rezultadu produsaun hosi agrikultor Maliana konsege hetan foos tonelada 21. Enkuantu dadus kona-bá natar Maliana mós iha 27,477 (lahan kering) ho produsaun 1,8 kada tonelada.

Notísia relevante: JICA-UNDP konstrui irrigasaun iha parte leste maibé seidauk normaliza

Jornalista   : Sérgio da Cruz

Editór          : Evaristo Soares Martins