Uma Mahon Forum Komunikasaun Balide asegura labarik besik na’in-20

DILI, 31 janeiru 2023 (TATOLI)–Fundadór Forum Komunikasaun Oratóriu Dom Bosco Balide, Cipriano Oliveira, hateten Forum Komunikasaun Oratóriu Dom Bosco Balide asegura labarik besik na’in-20.
Notísia Relevante: “Ami husu Governu tau matan ba vítima sira iha uma mahon”
“Foin lalais natál ne’e, ami reunifika tan labarik balun ba nia família sira no agora daudaun ne’e ita hela de’it labarik besik 20 mak ita asegura hela. Hosi labarik sira-ne’e iha kazu insestu, kazu violénsia seksual, violénsia doméstika no kazu abandonadu,” Cipriano Oliveira hateten ba Agência Tatoli, liuhosi telefónika, tersa ne’e.
Nia dehan, kazu sira-ne’e barak liu simu hosi parseiru inklui hosi Polísia Unidade Ema Vulnerável (VPU) no hosi Ministériu Solidariedade Sosiál no Inkkuzaun (MSSI).
“Iha uma mahon ne’e, ami mós fó formasaun ba labarik sira maibé ba labarik ne’ebé ho kazu kma’an ne’e ita reunifika ba eskola formal. Kazu hanesan violénsia seksual ho insestu ne’e ita labele fó sai tanba bainhira suspeitu sei iha li’ur ka sosiedade nia leet. Entaun ami koordena ho edukasaun hodi ekipa divizaun nian mak fó edukasaun ka hanorin sira lee no hakerek,” nia dehan.
Ba kazu sira-ne’e, uma mahon akompaña to’o tribunál bainhira suspeitu tama kadeia ona mak foin bele reintegra ba nia família.
Labarik sira-ne’ebé oras ne’e ha,ahon-an iha Uma Mahon Forum Dom Bosco baldie ne’e, maihosi munisípiu Baucau, Dili, Manatuto, Lautém, Ainaro, Suai no Ermera.
“Labarik barak liu hosi Dili no ida-rua hosi Baucau,” nia dehan.
Hanesan Prezidente Fundasaun haktuir, Forum Balide nia ezistensia hodi asegura no fó formasaun ba sira hahú tinan 2000.
“Ami hahú eziste iha tinan 2000 bainhira referendu, fenomena ne’ebé ami haree labarik mak iha dalan liu-liu iha oras kalan entaun ami hanoin oinsá atu tulun labarik sira. Iha momentu ne’ebá ami rekolla labarik liu 200. Hosi labarik sira-ne’e ami identifika kazu oioin hanesan inan-aman ba tiha Kupang-Atambua, maibé mai fali iha tinan 2014 mai leten iha atividade negósiu ne’ebé labarik halo iha dalan ninin sira, liu-liu iha restorante no posrtu Dili nia oin ne’e. Hosi ami-nia identifikasaun ba labarik halo atividade iha dalan mak ho kategoria rua, ida mak labarik balun iha inan ho aman ne’ebé halo atividade hahú hosi dadeer to’o lorokraik katak labarik sira-ne’e la eskola,” nia dehan.
Maibé kategoria daruak mak iha labarik balun ne’ebé iha inan no aman laiha maibé sira-ne’e kontinua eskola, se eskola dadeer entaun atividade lorokraik hanesan mós eskola lorokraik no halo atividade negósiu dadeer.
“Entaun hosi ne’e, ami haree no akompaña katak labarik kategoria B mak risku liu duké kategoria A, tanba sira hetan osan ona entaun sira la ba eskola ona,” nia hateten.
Nia esplika, labarik sira-ne’ebé tama iha kategoria A ne’e lori mai iha uma mahon atu buka identifika nia inan-aman no lori fila ba nia família no ajuda tama fali eskola formál.
“Ba kategoria B ami halo anima ka atividade ekstra ida ba sira iha semana ida dala rua. Maibé labele konvense sira no sira kontinua halo atividade negósiu. Entaun ho ida-ne’e ami hatene katak problema ne’e nia hun ne’e la’ós labarik maibé inan-aman. Família mak secara tidak langsung apoiu labarik sira. Ezemplu se labarik ida mak hetan osan mak inan-aman tenke husu tuir katak osan ne’e hetan iha ne’ebé no halo saida mak hetan osan, bainhira labarik dehan faan sasan mak inan-aman hakarak uza hodi faan tanba dala barak ne’e labarik faan laku liu duké ema boot,” nia sdehan.
Aleinde ne’e, nia dehan, iha labarik balun ne’ebé fase karreta iha eis GNR Caicoli no iha embaixadora Amérika nian, maibé ida-ne’e laiha ona tanba uma mahon iha programa ida hodi akumula labarik no identifika inan-aman hodi ajuda osan (modal) ba sira no fundasaun ne’e fó $250 ba kada família ida ba família liu 30.
“Ida-ne’e ami halo akordu ho família katak ida-ne’e hanesan kapitál ba sira hodi moris maibé osan ne’e la fó fila. Maibé apoiu ne’e ami halo to’o iha 2017 tanba bainhira tama iha situasaun impase entaun labele kontinua,” nia esplika.
Hosi tinan 2014 kazu abandonadu komesa menus maibé tesik fali mai violénsia doméstika, violénsia seksual, entaun hahú iha tinan 2014 atende fali ho kazu hirak-ne’e.
Iha uma mahon ne’e, nia kapasidade naton de’it mak akumula labarik 40 ne’ebé kompostu hosi feto na’in-20 no mane na’in-20.
Tuir nia, Ministériu Solidariedade Sosiál no Inkluzaun (MSSI) apoiu orsamentu ba FCJ Balide ba tinan rua tuir tuir malu hamutuk rihun $50, $30 ba saláriu no $20 ba operasionál nian.
Jornalista : Osória Marques
Editór : Cancio Ximenes

