DILI, 01 fevereiru 2023 (TATOLI)– Konsellu Ministru aprova alterasaun daruak ba Dekretu-Lei n.u 37/2022 kona-ba subsídiu fim de ano ba uma kain sira hodi alarga períodu pagamentu to’o abril tinan 2023.
Projetu dekretu-lei ne’e aprezenta husi Vise-Ministra Solidariedade Sosiál no Inkluzaun (MSSI), Signi Chandrawati Verdiál.
“Hodi bele garante pagamentu subsídiu refere ba reklamante sira ne’ebé sira-nian reklamasaun aprezenta ona no aseita husi Komisaun Pagamentu, projetu dekretu lei ne’e hakarak alarga períodu pagamentu to’o abríl 2023”, Ministru Prezidensia Konsellu Ministru, Fidelis Magalhães, hatete iha Palásiu Governu.
Ezekutivu sira deside hanaruk mós to’o loron 30 juñu prazu atu entrega ba Konsellu Ministru relatóriu ezekusaun diploma husi parte Ministra Solidariedade Sosiál no Inkluzaun.
MSSI finaliza ona pagamentu subsídiu $200 iha Timor-Leste, iha 11 janeiru 2023, maibé mosu reklamante rejistadu hamutuk rihun 28-resin.
Totál benefisiáriu ba subsídiu $200 iha territóriu hamutuk 339.954 ho montante osan alokadu $67,990.800.
Notísia relevante : https://tatoli.tl/2023/01/10/mssi-husu-pm-rezolve-lista-reklamante-subsidiu-200/
Jornalista: Antónia Gusmão
Editora: Maria Auxiliadora
