Uma-kain 80-resin iha Raiheu seidauk simu cesta bázika
BOBONARO, 01 fevereiru 2023 (TATOLI) – Komunidade hamutuk Uma-kain 80-resin iha suku Raiheu, postu administrativu Cailaco, munisípiu Bobonaro seidauk simu produtu cesta bázika hosi Governu.
Xefe suku Raiheu, Ventura Maria Tai, haktuir iha fulan-novembru tinan 2022 kompañia fornesidór distribui ona cesta bázika ba agregadu familiár hamutuk uma-kain 200-resin.
Notísia relevante: Empreza distribuitór Cesta Bázika 52 hetan ona pagamentu hosi MTKI
“Ha’u-nia suku cesta bázika sira fahe tiha ona, maibé lubuk ida mak seidauk, kuaze uma-kain 80 resin hanesan ne’e inklui mós ha’u (xefe suku),” nia informa ba jornalista Tatoli, iha Maliana kuarta ne’e.
Xefe suku ventura subliña, iha momentu halo distribuisaun Kompañia fornesedór lori sasán kompletu, maibé dadus ne’ebé Ministériu Turizmu, Komérsiu Indústria (MTCI) distribui fali dadus tinan kotuk nian ne’ebé utiliza hodi fahe sasán iha momentu pandemia Covid-19.
Enkuantu Governu deside prolonga tán tempu distribuisaun cesta bázika to’o fulan-marsu 2023, tanba ne’e Xefe suku Ventura husu ba parte kompetente atu buka solusaun lalais nune’e komunidade iha suku refere bele hetan hotu sira-nia direitu.
“Sasán ne’e tenke mai lalais, tanba planu governu nian ne’e tenke fahe hotu iha 2022, maibé agora to’o fulan-fevereiru 2023 ona mós sasán ne’e seidauk mosu mai hela de’it. Ida-ne’e ha’u hanesan autoridade lokál preokupa tebes.
Maibé tuir nia oberva katak, produtu ne’ebé antes ne’e distribui ona ba komunidade sira kompleta kada item, tanba ne’e konsidera programa governu ne’e iha benefísia tebes ba komunidade tanba produtu sira-ne’ebé admite maioria ai-haan lokál ne’ebé iha karbohidrat, proteína, vitamina atubele fó saúde di’ak ba komunidade no ajuda responde netik nesesidade iha loron balun.
Enkuantu Ministériu implementadór ba cesta bázika faze daruak ne’e mak Ministériu Turizmu, Komérsiu no Indústria ( MTKI ) ho totál millaun $ 40 no Sekretaria Estadu Kooperativa (SEKoop ) ho totál millaun $ 40.
Notísia relevante: Governu prolonga programa distribuisaun Cesta Bázika to’o marsu 2023
Jornalista : Sérgio da Cruz
Editór : Evaristo Soares Martins
