iklan

OPINIAUN

Lejislatura no Governu ideál ba Timor-Leste iha 2023 ba oin

Lejislatura no Governu ideál ba Timor-Leste iha 2023 ba oin

Memensio Sequeira Freitas.

Hosi Memensio Sequeira Freitas*

Kada tinan lima sidadaun Timor-Leste (sira ne’ebé tuir Lei atinje ona idade nu’udar eleitoradu) sempre ezerse ninia direitu sívika atu hili ninia reprezentante iha Uma Fukun Parlamentu Nasionál liuhosi Eleisaun Jerál ka baibain bolu Eleisaun lejislativa (parlamentár). Direitu sívika ida-ne’e konsta iha Konstituisaun Repúblika artigu 7 ne’ebé hateten “Povu hala’o nia kbiit polítiku liuhosi sufrájiu universál livre, diretu, sekretu no periódiku, no liuhosi forma seluk tan ne’ebé hakerek ona iha Lei-Inan”.

Nu’udar nasaun demokrátiku, Timor-Leste adota sistema demokrasia liuhosi realizasaun Eleisaun Prezidensiál hodi fó biban ba povu hili ninia Xefe Estadu (artigu 76 KRDTL), Eleisaun Lejislativa hodi povu hili ninia reprezentante sira ba tuur iha Uma Fukun Parlamentu Nasionál ne’ebé iha kbiit atu halo lei, atu fiskaliza no atu halo desizaun polítika (artigu 92 KRDTL) no atu nomea Xefe Governu (artigu 106 KRDTL) no mós Eleisaun Poder Lokál nian.

Tuir alínea “c” hosi konstituisaun artigu 86 ne’e fó kompeténsia ba Prezidente Repúblika atu marka, tuir lei, loron eleisaun ba Prezidente Repúblika no ba Parlamentu Nasionál. Nune’e, ita tomak hein ho hakmatek bainhira mak Prezidente Repúblika, José Ramos Horta uza ninia kompeténsia ida-ne’e atu dekreta data ba eleisaun lejislativa nian. Biar oras ne’e ita seidauk iha serteza kona-ba bainhira mak Prezidente Repúblika atu dekreta data eleisaun nian, maibé atividade partidu polítika sira iha baze hahú la’o namanas. Afiliasaun hosi partidu ida ba partidu seluk akontese daudaun iha sikun-sikun, konsolidasaun partidu polítika to’o propaganda sira kona-ba sé mak halo no la halo ne’e semo ba-mai. Kadi nanál ba malu entre líder topu sira partidu nian mós hahú kro’at be kro’at.

Situasaun balun presiza tetu antes ba eleisaun

Durante tinan 20 ka dékada rua nia laran, ita-nia rai ida-ne’e ukun hosi partidu boot rua hanesan partidu FRETILIN no partidu CNRT hamutuk ho ninia aleadu (partidu ki’ik) sira hanesan PD, PSD, ASDT, PLP no KHUNTO. Aleinde ne’e, durante ne’e ita hotu hatene katak figura importante sira hanesan Mari Alkatiri, José Ramos Horta, Kayrala Xanana Gusmão no Taur Matan Ruak mak kaer ukun troka malu pozisaun Primeiru-Ministru (Xefe Governu) iha ita-nia rain aleinde Estanislau Aleixo da Silva no Rui Maria de Araújo nu’udar Primeiru-Ministru ba Governu Konstitusionál datoluk no daneen.

Ita tenke dehan buat barak muda ona maibé buat barak loos mak seidauk konsege, liu-liu mehi atu  lori timoroan hotu-hotu (povu kbiit laek sira) la’o ba moris di’ak, ka, iha ita-nia palavra de ordem karik dehan libertar o povo (liberta povu) ne’e mak sei mangame hela. Povu barak (pursentu 41.8, tuir relatóriu hosi Dirasaun Nasionál Estatístika) sei moris hela iha liña pobreza nia okos, laiha kampu traballu sufisiente iha ita-nia rain, nune’e obriga joven sira tenke hakat ba rai seluk hodi buka servisu, ema oho malu kintu kantu, eskola barak nia kondisaun seidauk di’ak nafatin, estrada rurál barak nia kondisaun sei mizerável tebtebes, infraestrutura bázika iha fatin barak seidauk di’ak, bee-moos no saneamentu seidauk to’o ba ema hotu-hotu no situasaun sosiál seluk tan.

Iha parte seluk, povu maubere kontinua enfrenta hamlaha, aumenta tan ho sasán nesesidade bázika balun ne’ebé folin sa’e makaas, hafoin Governu hasa’e taxa ba produtu importadu balun hanesan karreta no bébida asukaradu sira sem iha kontrolu ba iha folin merkadu nian. Situasaun sira hanesan ne’e aumenta tan todan ba povu sira atu bele sustenta sira-nia moris loro-loron nian.

Ita gasta ona osan biliaun ba biliaun maibé ita lahatene osan sira-ne’e ba mout tiha de’it iha ne’ebé? Osan hirak ne’e gasta barak liu tiha de’it ba governante sira-nia viajen lokál no viajen estranjeiru inklui ajente funsaun públika sira-ne’ebé ba halo vizita Estadu no tuir estudu komparativu tuun-sa’e maibé la aplika ninia rezultadu ruma iha ita-nia rain. Ita gasta mós osan lubuk boot ida ba projetu sira-ne’ebé abandonadu iha dalan klaran hanesan buat ne’ebé akontese ho jardín Lifau no otél estrela 5 iha Oé-Cusse.

Portu Hera ne’ebé hamout tiha de’it osan millaun $9-resin iha tasi laran, uma MDGs ne’ebé halo ho osan boot maibé populasaun kuaze la uza no agora sai balada sira-nia horik fatin, osan Estadu nian ho montante boot ne’ebé lakon ho ministériu iha gabinete laran, projetu siluman (mate klamar) balun ne’ebé la liu hosi prosesu maibé Governu tenke selu, osan millaun ba millaun hodi konstrui Ró Haksolok maibé to’o agora la hotu rai hela de’it no kontinua presiza osan ba ninia kontinuasaun, programa Cesta Bázika ne’ebé nakfilak sai projetu hodi fó han de’it ba broker sira iha Ministériu relevante sira no selu-seluk tan.

Ita mós la konsege diversifika ita-nia ekonomia liuhosi investimentu ba setór produtivu sira hanesan turizmu, agrikultura, peska no explorasaun ba rekursu minerá seluk. Ita kontinua de’it depende ba osan mina-rai no hatene mak gasta lahó retornu ne’ebé klaru. La sente katak ita iha hela ameasa kona-ba sustentabilidade no seguransa finanseira, se ita la konsege hadi’a jestaun ba osan mina-rai tuir buat ne’ebé difine ona iha Lei Fundu Petrolíferu nian no tuir polítika sustentabilidade finanseira ne’ebé ita rasik formula iha polítika nasionál. Explorasaun mina-matan Greater Sunrise paradu tanba ita konsidera fali projetu ida-ne’e nu’udar líder ka partidu ida-nian envezde konsideradu nu’udar projetu Estadu. Privatizasaun ba projetu tasi-mane hosi polítiku sira la ajuda atu projetu sira-ne’e bele kontinua, de facto, projetu sira-ne’e ohin loron kontinua paradu.

Estadu mós sei kontinua fakar osan hodi selu eis titular no eis deputadu sira tinan ba tinan tanba to’o momentu ida-ne’e l iha duni vontade di’ak hosi membru Parlamentu Nasionál sira atu halo alterasaun ka revoga tiha Lei Pensaun Vitalísia ne’ebé sai preokupasaun públika nian. Ita gasta mós osan bara-barak ba saláriu prezidente empreza públika, institutu públiku sira no ajénsia sira Estadu nian (saláriu hosi prezidente EP no IP sira-nian boot liu fali Prezidente Repúblika nia saláriu), embora ita laharee rezultadu hosi sira-nia servisu. Empreza públika sira envezde buka hatama osan ba kofre Estadu maibé saida mak mosu mak sira hotu depende loos de’it ba Orsamentu Jerál Estadu. Faktu hatudu populasaun kontinua halerik ba bee-moos, ahi (eletrisidade) sei kontinua mate-lakan hodi estraga kliente sira-nia sasán eletroniku no fó prejuízu ba Estadu no empreza sira, rede internet sei kontinua lentu, komunikasaun no informasaun kontinua aat embora ita iha ona empreza no institutu públiku bara-barak.

Ita mós sei kontinua hatodan Orsamentu Jerál Estadu ho bens servisu ba political appointment sira (embora presiza duni) ne’ebé koloka nakonu iha repartisaun Estadu nian maibé appointment sira ne’e rasik balu loke de’it komutadór mós la hatene (la’ós hotu-hotu maibé balun sikat leet iha hela), ita lahatene saida mak sira bele kontribui ba Estadu ida-ne’e ho osan ne’ebé sira manán? Lei hateten momoos kona ba Ministru ka Vise Ministru ka Sekretáriu Estadu ida iha direitu atu lori political appointment hira, maibé realidade balun lori liu dook fali hosi buat ne’ebé Lei hateten. Karik ida-ne’e mak ita hanaran fahe oportunidade no riku hanesan mós ita lahatene, maibé buat ne’ebé mosu mak osan ne’ebé tinan-tinan ita aprova ne’e barak liu halai tiha de’it ba finansia mákina Estadu, nune’e osan ne’ebé koloka ba edukasaun, saúde, agrikultura, turizmu, infraestrutura bázika no polítika sira seluk ne’ebé halai liu ba benefisiu povu nian kontinua de’it ho alokasaun ki’ik. Realidade hirak ne’e la’ós foin akontese iha governasaun ida-ne’e maibé akontese tiha ona hosi kedas 2002 to’o mai agora daudaun.

Lejislatura no Governu Ideál ba Timor-Leste iha tinan 2023 ba oin 

Baze ba artigu 92 ita-nia Lei Inan ne’ebé fó kompeténsia ba Parlamentu Nasionál atu halo lei, halo fiskalizasaun no halo desizaun polítika ba Estadu tomak, mak ha’u hanoin membru Parlamentu Nasionál sira-ne’ebé sei eleitu iha eleisaun tinan ne’e presiza iha kapasidade natoon hodi kumprende kona-ba servisu lejislasaun nian. Membru Parlamentu sira tenke hatene di’ak kona-ba Lei no oinsá deside polítika ruma kona-ba distinu Nasaun nian, liu-liu iha relasaun ho planu dezenvolvimentu, polítika públika no finansa públika.

Parlamentu Nasionál mak sei aprova programa Governu no planu Orsamentu Jerál Estadu ne’ebé aprezenta hosi Governu. Oinsá mak membru Parlamentu sira bele diskute planu ho orsamentu ho didi’ak enkuantu sira barak ba tuir loos de’it orientasaun partidu nian? Serteza ke sira-ne’ebé pertense ba bankada Governu sei fó votu a-favór no hirak ne’ebé mai hosi bankada opozisaun sei vota kontra, sem tetu ho profundu tanbasá tenke kontra ka a-favór. Membru Parlamentu Nasionál sira presiza konxiente katak sira-nia votu sei fó efeitu direta ba Nasaun no Povu nia vida.

Parlamentu Nasionál mak sei kompoin no kria Lei estruturante sira ba Povu no Nasaun. Lei estruturante katak lei sira-ne’ebé prinsipál tebes ka lei baze sira hanesan Lei Baze Edukasaun, Lei Kódigu Penál, Lei Baze Saúde, Lei Baze Ambientál, Lei Investimentu no lei sira seluk ne’ebé importante ba vida nasaun nian inkluindu Lei Orsamentu Jerál Estadu. Atu diskute no aprova Lei hirak ne’e, mínimu membru Parlamentu Nasionál sira tenke inteira didi’ak kualker projetu-lei ka proposta-lei ne’ebé iha.

Nu’udar ita hotu hatene, poder lejislativa iha ninia kompeténsia rasik tuir Konstituisaun haruka. Napolitano Celso iha livru Poder Legislativo (2014, p. 10) aprezenta katak o Poder Legislativo, na condição de mais transparente e democrático dos poderes, tem como missão organizar e equacionar, pacífica e democraticamente, as contradições que a sociedade não pode nem deve assumir. O Parlamento, dentre outras, exerce três funções essenciais na democracia: a de representar a população, a de legislar ou elaborar as leis; e a de fiscalizar e controlar a aplicação dos recursos públicos, em cujo exercício conta com o apoio do Tribunal de Contas da União – TCU (ou, no caso das Assembleias Legislativas estaduais, com o apoio dos Tribunais de Contas dos Estados).

Atu bele hala’o didi’ak kna’ar importante sira-ne’e mak dala ida tan, partidu polítiku sira presiza halo selesaun ba ninia kuadru sira (mezmu karik laiha Lei ruma mak regula ida-ne’e) bazea ba sira-nia kapasidade intelektuál iha área determinadu ruma, nune’e sira bele reprezenta duni povu ho didi’ak no liu-liu bele diskute projetu-lei ka proposta-lei sira ho análize ne’ebé kle’an. Pelumenus partidu sira hili ema sira-ne’ebé iha kapasidade iha área edukasaun, saúde, agrikultura, polítika, diplomasia, seguransa, infraestrutura, finansa públika no área xave sira seluk, basá membru parlamentu sira ne’e ikus mai sei koloka ba iha komisaun parlamentár ne’ebé hatuur tuir artigu 27 hosi Rejimentu Parlamentu Nasional nian.

Membru parlamentu sira mós presiza iha domíniu ba língua ofisiál sira tuir manuál Parlamentu Nasional nian (2017, p. 128) katak As reuniões plenárias da primeira e da terceira terça-feira de cada mês, são realizadas em português. Ne’e katak membru parlamentu sira iha obrigasaun atu hatene komunika ho dalen portugés iha plenária normál ne’ebé hala’o iha tersa-feira semana dahuluk no datoluk kada fulan. Aleinde ne’e, membru parlamentu sira tenke hatene étika komunikasuan ne’ebé di’ak atu bele eduka povu iha baze. Tanbasá étika komunikasaun ne’e importante? Tanba tuir Rosário da Luz (2014) define katak O Parlamento é o fórum privilegiado para esta exposição; consequentemente, a comunicação encontra-se no epicentro das atribuições dos sujeitos parlamentares. Para nos habilitar às decisões cívicas e eleitorais exigidas pela existência em democracia, a comunicação parlamentar deve ser política, técnica, e eticamente qualificada – e a sua qualidade deve constituir uma consideração primária para os eleitores.

Aleinde hamoris lejisladór sira, eleisaun tinan ida-ne’e mós sei hamoris Governu foun ida (Governu Konstitusionál dasiak) hodi bele kontinua prosesu dezenvolvimentu ba oin. Artigu 106 hateten momoos katak Primeiru-Ministru sei hili hosi partidu ida-ne’ebé iha votu barakliu (katak partidu vensedór Eleisaun Jerál) ka hosi aliansa partidu sira-ne’ebé iha nia ema barak iha Parlamentu (katak partidu sira-ne’ebé konsege forma koligasaun ida forte) no iha nomeasaun hosi Prezidente Repúblika, bainhira rona tiha partidu polítiku sira-ne’ebé iha reprezentante sira iha Parlamentu Nasionál. Bainhira partidu vensedór ka koligasaun ida indijita ona Primeiru-Ministru, hafoin mak Primeiru-Ministru nomeadu sei hili ninia Membru Governu sira hosi partidu ne’ebé sustenta Governu (alineia 2 hosi artigu 106 KRDTL).

Artigu 103 ita-nia Lei Inan mós fó definisaun ida di’ak tebes ba Governu katak Governu nu’udar órgaun soberanu ida-ne’ebé iha responsabilidade atu hala’o no ezekuta polítika jerál nasaun nian no mós órgaun superiór Administrasaun Públika nian. Ho liafuan seluk karik dehan Governu mak nu’udar órgaun ezekutivu ho ninia kna’ar atu hala’o polítika dezenvolvimentu nasioál iha setór oioin tuir polítika nasionál ne’ebé hatuur ona iha Planu Estratéjiku Dezenvolvimentu Nasionál.

Normalmente Governu sempre konstitui hosi Primeiru-Ministru, Ministru, Vise Ministru no Sekretáriu Estadu sira (alineia 1 hosi artigu 104 KRDTL). Ministru, Vise Ministru no Sekretáriu Estadu sira hili bazea ba ninia kompeténsia iha área determinada sira, entre personalidade hosi rekoñesidu méritu iha ninia espesialidade (Joaquim, 2010, p. 3). Tanba bazea ba kapasidade iha área sira determinada tuir polítika Governu eleitu nian mak sei mosu Ministru Finansa, saúde, edukasaun, agrikultura no sira seluk tan ho apoiu mós hosi Sekretáriu Estadu sira.

Ita-nia Lei inan la define kona-ba Membru Governu hira mak Governu ida tenke iha, purtantu kona-ba númeru Membru Governu ne’e depende de’it ona ba Primeiru Ministru no partidu polítiku ne’ebé hamoris Governu ninia prioridade no polítika sira maibé konta mós ho bom senso no kapasidade jestaun hosi Primeiru-Ministru rasik atu ezerse ninia funsaun no obrigasaun sira iha boa administração ba asuntu sira komún nian. Membru Governu sirgnifika “Aquele que serve” (Ramos, 2008), ne’ebé sei hala’o servisu sira atu apoia komunidade. Nune’e, Membru Governu sira presiza hala’o kna’ar ho rasionalizasaun, sempre tau iha neon interrese komún sira nu’udar parte ida hosi ninia vokasaun operativa nian.

Timor-Leste la presiza Governu ida ho kompozisaun boot maibé ita presiza mak Governu ida iha vizaun, efetivu, efikás no efisiente iha ninia mandatu atu bele lori mudansa ba Povu no Nasaun nia vida. Governu ida ke la’ós de’it hatene sobu no monta foun sistema maibé ita presiza Governu ida ne’ebé hatene ajusta ninia programa sira tuir polítika nasionál ne’ebé hatuur ona iha Planu Estratéjiku Dezenvolvimentu Nasional (PEDN-la divia politizadu nu’udar partidu ida-nia obra maibé tenke sai obra nasionál, katak obra Estadu nian). Governu ida ke hatene responde nesesidade ninia Povu nian, katak ita presiza Governu ida ke la’ós preokupa liu fali ba nasaun seluk sira-nia frajilidade hodi haluha tiha katak ita-nia Nasaun mós sei falta buat barak.

Povu Timor-Leste presiza mak Governu ida hatene halo jestaun ba ninia rekursu finanseira ne’ebé iha (Fundu Petrolíferu) para ke bele responde ba nesesidade tempu naruk nian. Ita la presiza aloka orsamentu boboot iha kada tinan fiskál somente atu fakar arbiru de’it osan lahó retornu ne’ebé klaru. Governu ida ke sensível ba situasaun no hanoin ona katak ita sei iha ameasa fiskál bainhira ita la jere didiák ita-nia fundu mina-rai nian. Ita presiza mós Governu ida ke hatene buka osan ba Estadu maibé la’ós liuhosi hasa’e taxa ne’ebé hatodan fali kapasidade kompras ita-nia Povu nian. Ita mós presiza Governu ida ke hatene ona atu investe iha setór produtivu sira hanesan turizmu, agrikultura, peska no área seluk tan.Timor-Leste presiza Governu ida ke hatene kuidadu nia osan no la halo lakon osan iha gabinete laran rasik, sa tan permite ema atu lori halai sai osan hosi Timor-Leste ba rai seluk.

Ita mós presiza Governu ida ke hatene jere projetu sira tuir prosesu nune’e la hatodan Governu rasik bainhira halo pagamentu. Governu ida ke livre hosi hahalok korrupsaun, koluzaun no nepotizmu iha repartisaun Estadu nian tomak. Governu ida ke iha kapasidade atu atende populasuan sira ho lalais no fasil, katak Governu ida ke la konfuza ninia sidadaun sira ho burokrasia ne’ebé deifisil. Membru Governu indijitadu sira presiza iha personalidade di’ak, integridade morál, iha kapasidade intelektuál no teknoratu pelu menus iha área ne’ebé nia tutela ba. Membru Governu ida ke la bá tuur iha ministériu atu manán de’it predikadu “Sua Excelncia” no ganha de’it priviléjiu no regalia sira. Ita mós presiza Membru Governu ida ke forte iha ninia ekipa atu bele halo servisu ho di’ak no ho rezultadu pozitivu ba Nasaun. Membru Governu ida ke la’ós hatene de’it gasta osan ba viajen estranjeiru ne’ebé laiha benefisiu komún, ita presiza mak Membru Governu ida ke bele fó prestasaun di’ak ba Estadu no ba Povu.

Hirak ne’e hotu fila ba partidu polítiku sira-ne’ebé sei konkore iha eleisaun lejislativa tinan ida ne’e. Seraké partidu polítiku sira iha duni ninia kuadru sira ke bele prenxe kondisaun sira-ne’e ka kuadru sira-ne’ebé iha de’it ambisaun boot atu okupa kargu sira importante mibé laiha planu no vizaun ne’ebé di’ak. Governu no lejilatura ne’ebé sei mai depende mós ba konfiansa votu ne’ebé Povu eleitoradu sira sei fó iha eleisaun tinan ne’e. Se eleitór sira sei hili tuir ninia emosaun no fanatizmu hodi la tetu didi’ak katak sira-nia votu sei fó efeitu direta ba Nasaun no Povu nia vida mak ita sei la hetan lejislatura no Governu ideál ida iha tinan ne’e ba oin. Karik, votante sira sei vota ho rasionalizmu katak tetu ho didi’ak partidu sira hotu nia kapasidade umana ne’ebé iha (la hili tanba partidu ida lideradu hosi sé ka sé) mak oxalá ita sei hetan duni Governu no lejislasaun ida-ne’ebé sei lori Timor-Leste ba oin ho serteza. Ita lakon tempu durante tinan 20 ona atu mangame de’it ho governasaun, tinan ne’e ba oin, Timor-Leste labele lakon tan tempu ba polítika selok malu. Ita tenke sai ona hosi situasaun ida-ne’e hodi hakat ba futuru ida nabilan tuir patriota no mártir sira-ne’ebé fakar ona sira-nia raan ba liberdade rai no povu ida-ne’e nia mehi. Obrigadu barak

*) Hakerek na’in nuúdar povu baibain ida no manorin na’in iha ESG 12 Novembro Dili no hela iha Manleuana.

iklan
iklan

Leave a Reply

iklan
error: Content is protected !!