Vise MS enkoraja komunidade Maliana badinas halo ezersísiu

BOBONARO, 15 fevereiru 2023 (TATOLI) — Vise Ministru Saúde, Bonifacio Mau-Coli dos Reis, kuarta ne’e inaugura fatin jimnástika rua ne’ebé instala iha kapitál Maliana, munsípiu Bobonaro.

Fatin jimnátika ne’e ne’e apoia hosi Organizasaun Mundiál Saúde (OMS) iha Timor-Leste no nia lema ‘Promove Estímulu Moris Saudável liu hodi halo ezersísiu’.

Ekipamentu Open Air GYM  rua ne’e  ida instala iha rotunda Maliana nian besik kampu futeból Maliana no ida iha edifísiu administrasaun munisipál Bobonaro.

Vise Ministru Bonifacio Mau-Coli dos Reis, agradese ba OMS ne’ebé mak iha inisiativa di’ak hodi apoia ekipamentu refere ba Governu Timor-Leste hodi instala iha munisípiu Bobonaro no territóriu nasionál.

Tuir nia, instalasaun ne’e bele atinje moto ne’ebé MS hakarak povu tenke saudável iha Timor-Leste.

Notísia relevante: Prevene moras la hada’et, OMS entrega ekipamentu jinástika ba MS

“Ita hotu hatene iha tinan kotuk ka tinan rua liubá, ha’u halo proposta husu katak bazea ba Timor-Leste nia moras atuál ne’ebé maka komesa loron ba loron sa’e, maka moras hada’et liuliu ema-ne’ebé sofre moras diabetes, moras fuan, moras tensaun alta no moras mentál tanba ne’e mak ita presiza ekipamentu,” Vise Ministru Saúde ne’e informa.

Prezidente Autoridade Munisípiu Bobonaro, Ernesto de Oliveira Barreto, reforsa ekipamentu hirak-ne’e ajuda tebes komunidade atu hadi’ak idak-idak nia saúde, liuliu ba sira-ne’ebé ho idade avansadu.

“Hau hato’o obrigadu ba Organizasaun Mundiál Saúde, sasan sira GYM ne’e iha, ami katuas sira mós lokraik-lokraik bele halo ona ezersísiu iha-ne’e, keta balu tensaun karik bele rezolve ho buat sira-ne’e,” Ernesto dehan.

Komandante PNTL munisípiu Bobonaro, Superintendente Antoninho Mauluta, sei orienta membru sira kontrola no asegura ekipamentu hirak-ne’e, maibé importante liu mak ema idak-idak tenke tau responsablidade la’ós polísia mesak de’it.

“Ita-nia komunidade sira, liuliu ita-nia autoridade lokál sira tenke tau matan hamutuk, ita-nia oan sira bele uza sasán ne’e ho durasaun tempu ne’ebé naruk. Ita uza mós tenke haree ba sasán sira monta ne’e balu ba idade natoon, dalaruma sira-ne’ebé iha presaun maka’as karik labele mai silu arbiru,” nia apela.

Notísia relevante: MS-OMS planu promove moris saudável hodi prevene moras la hada’et

Jornalista: Sérgio da Cruz

Editór: Evaristo Soares Martins