OÉ-CUSSE 17 fevereiru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixào Bano, sesta ne’e selebra akordu ho Agência Teknolojia Informasaun no Komunikasaun Timor, Institutu Públiku, (TIC Timor IP), ba iha investimentu komponente tolu atu transforma prestasaun servisu iha setór públiku no privada hodi kontribui ba prosesu dezenvolvimentu infraestrutura sira iha Oé-Cusse.
Prezidente Tic Timor I.P, Roberto Dionísio de Sousa, informa, kooperasaun ne’e importante tebes iha ámbitu TIC Timor bele tulun RAEOA iha kortu médiu prazu, hodi fasilita di’akliu tán prestasaun servisu iha setór públiku no privadu, liuliu ba dezenovlimentu RAEOA atu transforma servisu sira-ne’ebé iha dijitál liuliu iha área Téknolojia Informasaun no Komunikasaun nian..
“Akordu ohin asina sei fahe ba komponente importante tolu ne’ebé iha ona konkordánsa ho Autoridade RAEOA,” Prezidente TIC Timor I.P, Roberto Dionísio de Sousa, ko’alia iha Otél Ambeno Oé-Cusse.
Komponente primeiru, fornese opsaun tékniku, dadús investimentu kona-bá infraestrutura teknolójia informasaun no komunikasaun detallu sira iha RAEOA, daruak, sei kolabora identifika no halo supervizaun ba infraestrutuira relasiona ho teknolojia informasaun no komunikassaun iha RAEOA.
Komponente ikus liu maka sei dezenvolve sistema aplikasaun siénsia sira atu suporta dezenvolvimentu kona-bá infraestrutura teknolojia informasaun no komunikasaun inklui aspetu seluk ligasaun ho sistema teknolojia no komunikasaun nian.
“Liuhosi servisu hamutuk ida-ne’e, RAEOA sei kontribui mós ba esforsu TIC Timor nian, hodi hamenus gastu nesesáriu iha área informátika, ne’ebé sentraliza no asegura sistema informátika sira iha sentru dadús Governu eletróniku, fasilita asesu ba infraestrutura informátika ne’ebé modelu liu no seguru atualizadu no dezenvolvidu hosi ita-nia timor-oan rasik,” nia afirma.
Iha biban ne’e, Prezidente Autoridade RAEOA, Arsénio Paixão Bano, orgullu, tanba bele fasilita servisu públiku, liuliu diretór, xefe departementu no sekretáriu rejionál sira fasíl bele kontrolu to’o funsionáriu sira, importante tanba atu mellora prestasaun servisu públiku no garante transparánsia.
“Ita asina MoU ho TIC Timor atu ita hahú haree took, sei ita Oé-Cusse bele tama iha Governu dijitalizasaun, bainhira ita tama iha-ne’e parese fasil atu kontrola komunika ba malu, hamenus surat-tahan no dadús sira-ne’e,” nia katak.
Tan ne’e bainhira parte TIC Timor aprenzenta, Autoridade propoin uluk atu hahú uluk hosi Sekretária Rejionál ba Asuntu finánsa koko ba free and balance, nune’e fasil komunikasaun ho servisu sentrál.
“Ne’e maka ha’u interesadu tebes atu tama iha diskusaun ne’e, sei iha diretór aplikasi karik bele kria ida espesiál ba RAEOA ninian, nune’e bele kontrola sasán Estadu inklui transporte sira, ida-ne’e mós atu garante transparánsia atu mellora prestasaun servisu públiku iha Oé-Cusse,” Arsénio Bano, orgullu.
Notísia relevante: TIC Timor realiza semináriu garante transparánsia mellora prestasaun servisu públiku iha RAEOA
Jornalista: Abílio Elo Nini
Editór: Evaristo Soares Martins
