OÉ-CUSSE 20 fevereiru 2023 (TATOLI) – Ministériu Finánsa (MF) liuhosi Diresaun Jerál Tezouru no Unidade Legál, segunda ne’e sensibiliza kona-bá prosedimentu dekretu-lei ezekusaun Orsamentu Jerál Estadu (OJE) 2023 ho regra autorizasaun despeza no aprovizionamentu ba kargu xefia sira iha rejiaun Administrativa Espesiál Oé-Cusse Ambeno (RAEOA) hodi ezekuta ho di’ak.
Diretór Nasionál Tezouru, Regime de Jesus, informa, objetivu hosi dessiminasaun ne’e foku ba regra no prosedimentu ezekusaun Orsamentu Jerál Estadu (OJE) 2023 nian, no disseminasaun mós informasaun foun sira relasiona ho ezekusaun OJE 2023 nian ba Autoridade sira iha Oé-Cusse hodi ezekuta ho di’ak.
Notísia relevante: PN aprova proposta-lei OJE 2023 biliaun $3,16 iha finál globál
“Sensibilizasaun halo iha Oé-Cusse la’ós tanba fallansu maka ami mai halo disseminasaun ba ezekusaun, maibé bainhira Ministériu Finansa introdús regra foun sira, obrigatoriamente ami tenke halo disseminasaun, atu fasilita kompreensaun ba entidade sira hotu ne’ebé mak ezekuta OJE nian atu iha koñesimentu ne’ebé di’ak, bele ezekuta bazea planu tuir regra no prosedimentu sira-ne’ebé maka iha ona,” Diretór Nasionál Tezouru, Regime de Jesus, ko’alia iha abertura sensibilizasuan ne’ebé hala’o iha otél Ambeno, Oé-Cusse.
Nia informa, regra ezekusaun la’ós maioria foun maibé introdús artigu balu ezekusaun nian ho buat foun balu ne’ebé prevista iha dektru-lei ezekusaun nian, ida-ne’e nafatin tenke ezamina no mós iha OJE 2023.
“Tán ne’e kestaun ho reforma jestaun finánsa públika, ita tenke halo beibeik mudansa, tán ne’e maka bainhira ami iha ona mudánsa hanesan ne’e, presiza dissemina ba kargu xefia sira-ne’ebé ezekuta OJE nian bele iha koñesimentu di’ak, nune’e labele iha difikuldade iha prosesu implementasaun,” nia afirma.
Diretóra Nasionál Tezouru, reprezenta Ministériu Finansa, husu funsionáriu sira iha RAEOA, inklui liña setorál sira, ne’bé partisipa iha disseminasaun ne’e, bele partisipa másimu nune’e intende, bainhira tama iha prosesu ezekusaun bele ezekuta OJE ho di’ak no kualidade.
Iha biban ne’e, Prezidente Autoridade RAEOA, Arsénio Paixão Bano, agradese ba Governu Sentrál liuhosi Ministériu Finansa, bele fó koñesimentu ba kargu sira iha kada diresaun hodi aumenta koñesimentu kona-bá regra foun ezekusaun OJE 2023 nian iha Oé-Cusse.
“Ha’u agradese ba Ministériu Finansa bele mai fó koñesiementu ne’e di’ak ba ita, hosi planeimentu sira iha Oé-Cusse, ohin kompletu kada diresaun atu partisipa iha disseminasaun ne’e, hahú hodi aprovizionamentu, Gabinete Prezidente Autoridade RAEOA hamutuk ho diresaun hotu-hotu, tán ne’e asuntu importante atu hatene regra ezekusaun OJE 2023 nian,” nia orgullu.
Notísia relevante: https://tatoli.tl/2021/07/05/proposta-lei-enkuadramentu-orsamental-konsagra-ho-prinsipiu-11/
Jornalista : Abílio Elo Nini
Editór : Evaristo Soares Martins
