iklan

EKONOMIA, HEADLINE

KFF identifika manu kakatua no pombu timor ameasadu atu lakon

KFF identifika manu kakatua no pombu timor ameasadu atu lakon

Manu pombu. Imajen espesial

DILI, 27 fevereiru 2023 (TATOLI)— Organizasaun Naun Governamentál Konservasaun Flora no Fauna identifika manu kakatua no manu pombu timor, nu’udar espésie rua iha Timor-Leste ne’ebé ameasadu atu lakon.

Liafuan ne’e dehan hosi Diretór  KFF, Alito Rosa ba  Agência Tatoli iha Letefoho Specialty Coffee Roaster, tasi-ibun, Dili, segunda ne’e.

Nia isplika, KFF nia ezisténsia durante ne’e halo  ligadu ho konservasaun ba flora no fauna liuliu ekosistema mangrove, budu tasi no ahu ruin nomos  seluk tan.

“Ita mós halo sosializasaun ba komunidade kona-ba espésie sira ne’ebé daudaun iha ameasadu nia-laran atu lakon hanesan manu kakatua no manu pombu timor nian. Ita halo sosializasaun ne’e ho objetivu oinsá timor-oan iha koñesimentu atu proteje ita-nia rikusoin sira. Tanba, espésie sira ne’e besik atu lakon kauza hosi natureza no ema kontinua halo kasa ilegál,” Alito Rosa dehan.

Manu kakatua. Imajen espesial

Nia dehan, durante sira-nia parte halo sosializasaun ba komunidade hahú iha mudansa tanba komunidade balu hatene ona oinsá atu konserva rikusoin sira. Maibé mós iha komunidade área rurál balu sei kontinua halo kasa, tanba sosializasaun lei kona-ba protesaun biodiversidade ne’e seidauk másimu iha área rurál.

“Ita halo sosializasaun ne’e iha komunidade balu iha konsiensia hahú la kasa. Maibé iha mós balu kontinua kasa liuliu área rurál sira ne’e tanba Estadu iha ona lei maibé sosializasaun ne’e mak seidauk másimu liuliu prenda arma branka sira hanesan kilat manu ne’ebe uja hodi kasa,” nia hateten.

Nia dehan, kilat manu ne’e rasik fó impaktu tebes ba biodiversidade iha Timor-Leste liuliu animál rai-maran nian. Tanba, maiória komunidade iha área rurál ne’e uza kilat refere kontinua kasa ba animál fuik sira, no kaer animál fuik sira hanesan loriku, kakatua no seluk tan.

Nia afirma, atu proteje biodiversidade, Timor-Leste iha ona lei hanesan hanesan, lei ambientál ne’ebé hetan ona promulgasaun  hosi  xefe Estadu. Lei sira ne’e maka henesan dekretu lei, núméru 26/2011 kona-ba lei báziku ambientál.

Hosi lei ne’e, nia dehan dezenvolve tán dekretu lei lisensiamentu ambientál númeru, 39/2022 ne’e altera ona ba dekretu lei númeru 5/2011 nian.

Nune’e iha mós, dekretu-lei plástiku nian númeru 26/2020 lei. Lei  ne’e atu bandu labele importa tán plástiku, inklui bebida ne’ebé mili-litru 0.5 mai kraik.

“Haree hosi lei sira ne’e, ha’u hanoin lei ne’e di’ak ona maibé tenke implementa ho di’ak liuhosi sosializasaun másimu iha terrenu. No bainhira ema ruma komete iregularidade tenke fó sansaun ne’ebé makaas nune’e, evita ema kasa animál fuik liuliu kuidadu ita-nia biodiversidade iha Timor-Leste,” Alito hateten. 

Jornalista : Arminda Fonseca

Editora     : Armandina Moniz

iklan
iklan

Leave a Reply

iklan
error: Content is protected !!