iklan

EKONOMIA, BOBONARO, HEADLINE, MUNISÍPIU

Agrikultura Bobonaro husu komunidade proteje no prezerva balada fuik

Agrikultura Bobonaro husu komunidade proteje no prezerva balada fuik

Imajen ne'e foti hosi Google

BOBONARO, 28 fevereiru 2023 (TATOLI)-Diretór Agrikultura Munisípiu Bobonaro, Alberto Gomes Lopes, husu komunidade hotu iha postu administrativu neen atu proteje no prezerva balada fuik sira tanba pertense ba riku-soin Timor-Leste nian.

Nia konsidera, balada fuik hanesan parte ida hosi soberania nasaun nian, ne’ebé iha direitu atu moris ho símbolu atu hatudu ba mundu katak Timor-Leste iha riku-soin naturál barak.

Notísia relevante: SEA husu públiku tenke kuidadu rikusoin flora no fauna iha Timor-Leste

“Ha’u hanoin buat ida halo prevensaun la’ós pepél governu nian, maibé sidadaun hotu-hotu katak balada sira-ne’ebé ninia populasaun menus ona ita tenke asegura, nune’e ita-nia orijinál identidade nasaun Timor ne’e labele lakon, animál ne’ebé mak la presiza ita oho, ita presiza dezenvolve barak liután atu nune’e ita-nia rai bele fila-fali hanesan uluk, matak,” Alberto informa ba Jornalista sira, iha Holsa, Maliana, tersa ne’e.

Nia subliña, departamentu delegasaun territoriál florestál, kontinua esforsu asegura baladak fuik sira-ne’ebé governu bandu. Maibé dala barak observa katak komunidade barak seidauk iha konsénsia atu salva guarda flora no fauna.

Tuir nia, presiza sosializa iha baze  atubele konsensializa komunidade sira atu proteje animál fuik sira hanesan; rusa, loriku, meda no lekirauk.

Alberto hatutan, bainhira komunidade laiha konsénsia asegura flora ho Fauna, fiar katak tinan 10 oin mai riku-soin Timor nia sei menus no afeta mós ba ema moris.

“Ita-nia nasaun kloot, sé ita rasik mak laiha sentimentu ba ita-nia riku-soin. Ita mak la sente na’in ba animál hirak-ne’e mak defisil ba ita atu halo prevensaun ba ita-nia riku-soin sira-ne’e,” Alberto katak.

Konabá riku-soin iha tasi, diresaun serbisu hamutuk ho parseiru sira liuhosi Projetu Sustanable Agriculture Productivity Improvement Project (SAPIP), konsege konserva ona área protejida sira, liuliu basia idrografia mota Loes, ne’ebé konsege implementa iha postu Balibo, Cailaco no Maliana durante tinan haat ona.

Alende ne’e guarda floreta sira mós halo ona kontrolu no asegura balada fuik sira-ne’ebé governu bandu, maibé númeru guarda la sufisiente atu destaka kada suku ema na’in-ida.

“Ita-nia guarda ne’e foin lalais mai tán ne’e 26, hamutuk 30 ne’e sei la sufisiente tanba ita-nia hakarak ne’e asegura riku-soin, liuliu flora ho fauna, presiza aumenta tán, minimu kada suku ita destaka ema na’in-ida, maibé ida de’it mós labele tanba área luan,” nia katak.

Estraga rekursu naturál hanesan flora no fauna sei hetan sansaun hanesan tama kadeia tinan tolu to’o lima no hetan multa ho valór osan $5.000 bazea ba regulamentu UNTAET númeru 19/2000. Nune’e mós bele julga infratór sira liuhosi Kódigu Penál Timor-Leste nian.

Notísia relevante: KFF identifika manu kakatua no pombu timor ameasadu atu lakon

Jornálista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!