Xefe Estadu sei konsulta ho jurista molok promulga lei protesaun labarik
DILI, 28 fevereiru 2023 (TATOLI)—Prezidente Repúblika, José Ramos Horta, sei konsulta jurista molok foti desizaun no promulga Lei Protesaun ba Labarik no Joven iha perigu ne’ebé Parlamentu Nasionál aprova ona.
“Lei protesaun labarik ne’e ha’u simu tiha ona, maibé ha’u sei husu lai ha’u-nia jurista sira, ha’u pesolamente laiha problema ho lei protesaun ba labarik. Ha’u sei promulga, ha’u koñese lei ne’e, ha’u hatene Parlamentu Nasionál aprova tiha ona, laiha problema atu promulga,” PR Horta hateten ba jornalista sira hafoin partisipa iha programa simpóziu nasionál “Hametin Demokrasia, Pás no Estabilidade iha Konstrusaun Estadu”, iha salaun Laline Larigutu, Colmera, tersa ne’e.
Antes ne;e, iha loron 07 fevereiru 2023, Parlamentu Nasionál (PN) liuhosi reuniaun plenária aprova projetu-lei númeru 29/V (3a )-Lei Protesaun Labarik no Joven iha Perígu ho votu a – favór 36 , kontra no abstensaun 0.
“Nune’e projetu-lei Protesaun ba Labarik no Joven iha Perígu aprova iha finál global. Nune’e husu komisaun F atu halo redasaun finál tempu badak haruka fila mai meza hodi envia ba Prezidente Repúblika halo promulgasaun, ” Prezidente Parlamentu Nasionál (PPN), Aniceto Longuinhos Guterres Lopes, hatetetn iha sala plenária PN.
Inisiativa lejizlativa nee bazea ba rezolusaun Parlamentu Nasional numeru numeru 16/2003, 30 jullu, neebe Timor-Leste ratifika Konvensaun kona-ba Direitu Labarik.
Entidade sira ne’ebé submete pareser ba projetulei ne’e mak hanesan ALFeLa, Asosiasaun Defisiente Timor-Leste (ADTL), Child Fund, Komisaun Nasional Direitu Labarik, FOKUPERS, FONGTIL, JSMP Ministeriu Justisa, Ministeriu Saude, Ministeriu Solidariedade Sosial no Inkluzaun, Ministeriu Publiku.
Jornalista : Osória Marques
Editór : Cancio Ximenes
