iklan

DILI

Feto presiza karreira dependénsia iha mundu komérsiu nian

Feto presiza karreira dependénsia iha mundu komérsiu nian

Inan feton treseira idade involve iha vida negosiu.Imajen/TATOLI

DILI, 07 maru 2023 (TATOLI)–Jenerál Manajer ba Kompañia Tech, Ana Paula Xavier, hateten feto sira presiza kaer papél dezenvolvimentu karreira ne’ebé ho dependénsia iha mundu komérsiu nian.

“Ha’u uza teknolojia atu maneja no komunika ho ha’u belun no ajuda kontinua organiza no jere ha’u-nia tempu ho ekipa, buka dalan ba tranzisaun negósiu no automatiza prosesu efetivu. Hanesan feto ida iha teknolójia kaer papel iha ha’u-nia dezenvolvimentu kareira ne’ebé ho dependénsia boot ba teknólojia iha mundu komérsiu nian, iha koñesimentu espesializadu iha teknólojia bele hetan valór boot,” nia dehan ba jornalista sira hafoin partisipa loron internasionál Feto ho tema “inovasaun ba futuru ne’ebé igual ba jéneru”, iha Otél Timor, Dili, tersa ne’e.

Tanba, nia dehan, dezenvolvimentu teknolojia no tendénsia sira-ne’ebé resente hodi garante katak empreza kontinua sai kompetitivu iha merkadu, maibé hosi ne’e iha mós dezafiu sira-ne’e inklui oportunidade servisu limitadu falta koñesimentu tékniku.

“Iha Indústria Tech dala barak presiza fundasaun tékniku forte ida-ne’ebé karik halo ha’u ho kolega feto maluk sira seluk susar atu tama iha indústria ne’e. Ha’u ultrapasa dezafiu hirak-ne’e, hodi hola pasu sira ne’ebé proativu atu hasa’e ha’u-nia koñesimentu tékniku, rede no kontinua buka hatene nafatin kona-ba dezenvolvimentu indústria nian. Tanba ne’e atu enkoraja feto barak liután hodi partisipa iha Indústria Tech nian, presiza fó sira-nia oportunidade no apoiu ne’ebé hanesan, inklui programa edukasaun no formasaun, mentoria no oportunidade sira seluk ne’ebé hanesan no oportunidade sira kona-ba vensimentu no promosaun nian,” nia dehan.

Ana Paula hateten, nia jornada kareira hahú iha tinan 2009, bainhira hahú servisu hanesan ofisiál ba entrada dadus no analista ba projetu baze dadus aprovizionamentu ho Peace Dividend Trust. Objetivu prinsipál hosi projetu ne’e mak hari merkadu Timor nian, kria traballu no sustenta pás iha país sira-ne’ebé iha hela dezenvolvimenta nia-laran liuhosi tulun emprezáriu lokál sira no liga sira ho oportunidade negósiu nian.

“Hosi esperiénsia ne’e hanorin ha’u importánsia atu tau atensaun didi’ak no akurásia ba jestaun dadus. Esperiénsia ida-ne’e la’ós aumenta deit ha’u-nia kapasidade téknika maibé mós hanorin ha’u kona-ba importánsia servisu iha ekipa no komunikasaun atu atinje meta projetu nian. Ha’u-nia tempu hanesan ofisiál ba entrada dadus no analista nu’udar esperiénsia aprendizajen ida-ne’ebé importante tebes no ida-ne’ebé tau fundasaun forte ba ha’u-nia karreira iha futuru. fornesedór formasaun Internasionál ida naran ISAT. Ha’u mak responsavél atu jere iha tinan 2014, ha’u hahú servisu hanesan koordenadora ba negósiu no formasaun ba projetu konteúdu lokál oioin kona-ba kompañia petróleu no gás,” nia dehan.

Nia dehan, ida-ne’e envolve superviziona aspetu hotu-hotu negósiu nian inklui jestaun projetu, jestaun ekipa, fornesimentu formasaun, jestaun relasaun kliente no jestaun finanseira.

Depois iha 2016, nia avansa ho pozisaun nu’udar diretóra ezekutivu empreza nian ho responsabilidade atu tau-matan ba operasaun tomak empreza ne’e nian inklui jere ekipa formadór na’in-tolu (3), dezenvolve oportunidade foun sira ba negósiu no garante katak empreza ne’e hatán duni ba nesesidade hosi ninia kliente sira.

Maibé iha tinan 2019, foti desizaun atu husik pozisaun nu’udar Diretora Ezekutivu no sai konsultór independente ida.

“Ne’e desizaun ida-ne’ebé signifikante mai ha’u maibé ha’u hatene katak ida-ne’e sei fó mai ha’u oportunidade fresku hodi aumenta ha’u-nia koñesimentu iha formasaun, edukasaun no setór emprezariál. Hanesan konsultor independente, ha’u iha oportunidade atu servisu ho organizasaun oioin. Ida-ne’e permite ha’u atu haluan tan ha’u-nia rede no hetan espozisaun ba indústria no modelu negósiu oioin. Liuhosi servisu ho kliente oioin, ha’u bele hasa’e estratéjia no dezenvolvimentu ba abilidade iha área sira hanesan jestaun projetu no planeamentu,” nia hateten.

Nia dehan, vantajen sai konsultór independente mak iha oportunidade atu hili hodi servisu iha área atribuisaun oioin hosi konsepsaun, projetu sira-ne’ebé aliña ho nia interrese no kapasidade, nafatin sustentavél.

“Depois iha tinan 2022, aprezenta ona ba ha’u iha oportunidade di’ak ida atu tama ba Similie, nu’udar Jenerál Manajer iha responsabilidade atu tau-matan ba atividade ka operasaun loro-loron negósiu nian, hodi ho di’ak no identifika área sira-ne’ebé mak garante katak operasaun sira hotu la presiza hadi’a. Ha’u servisu besik liu ho ekipa atu dezenvolve no implementa estratéjia sira ne’ebé sei hasa’e funsaun emprezariál tomak no hasa’e efisiénsia. Ha’u-nia responsabilidade prinsipál ida mak jere orsamentu hodi asegura katak ami sei uza didi’ak rekursu sira,” nia hateten.

Jonalista : Osória Marques

Editór    : Cancio Ximenes

iklan
iklan

Leave a Reply

iklan
error: Content is protected !!