UE apoiu rihun €666-resin ba projetu “futuru ne’ebé inkluzivu no seguru”
DILI, 09 marsu 2023 (TATOLI)—Uniaun Europeia (UE) apoiu orsamentu €666.667 ba projetu “futuru ne’ebé inkluzaun no seguru” ne’ebé sei implementa hosi Plan International Timor-Leste (PITL) hamutuk ho, Asosiasaun Halibur Defisiénsia Matan Timor-Leste (AHDMTL) no Arcoiris Timor-Leste, sei apoia ba Ema ho Defisiensia (EhD) no membru LGBTQI +.
Emabaixadór UE ba Timor-Leste, Marc Fiedrich, hateten projetu ne’e sei foka liu ba feto foinsa’e sira iha sira-nia diversidade tomak no sei ba komunidade 12 iha munisípiu Ainaro, Dili, no Ermera hodi foti asaun no lidera goza tomak sira-nia direitu umanu, direitu sosiál no ekonómiku. projetu ne’e sei implementa durante 2,5 (fulan-30).
“Iha Timor-Leste hanesan iha fatin seluk, sei iha dalan naruk atu asegura katak ema ho defisiénsia no komunidade LGBTQI+ iha direitu no oportunidade hanesan ho ema seluk. Ema ho Defisiensia no LGBTI+ hasoru obstákulu no obstákulu espesifiku sira-ne’ebé fó garantia ba atensaun no asaun hosi polisia no advogadu sira,” Marc Fiedrich hateten iha lansamantu projetu “futuru ne’ebé inkluzivu no seguru”, iha salaun Delta Nova, kinta ne’e.
Embaixadór ne’e hateten, dala barak sira nafatin hetan impedimentu tanba halo provizaun nesesáriu ne’e bele karun.
”Ha’u la’ós de’it dehan katak sira bele gasta osan barak maibé mós presiza tempu barak no esforsu atu apreende no konsidera saida mak presiza. Polítiku no halo polítika-na’in sira-ne’ebé halo desizaun, ne’ebé iha vontade atu halo esforsu ida-ne’e, bele haree lalais katak sira mai ho krítika. Buat hirak-ne’e bele kritika tanba la’o neineik liu, tanba gasta osan barak liu ba buat ne’ebé benefisia ema uitoan de’it, tanba la gasta tempu no rekursu natoon atu hatán ba situasaun timoroan barak ne’ebé susar tebes,” nia hateten.
Diretora Nasionál Interinu PITL, Fátima Estrela Soares, hateten projetu ne’e sei kontribui ba promosaun igualdade, inkluzaun no respeitu ba diversidade ba ema hotu.
“Projetu ida-ne’e sei kontribui ba promosaun igualdade, inkluzaun no respeitu ba diversidade ba ema hotu. Tan ne’e ha’u hakarak hato’o ha’u-nia agradesimentu kle’an ba Uniaun Europeia ne’ebé fó apoiu finanseiru ba implementasaun projetu ne’e iha munisipiu tolu. Ha’u hakarak apresia instituisaun Govemu no organizasaun sira hanesan SEII, MSSI, MOFE, MoJ no SEFOPE, tanba sira-nia apoiu ba prosesu dezenvolvimentu projetu no sei kontinua apoia implementasaun projetu ne’e,” nia dehan.
Diretór Ezekutivu Interinu Asosiasaun Halibur Defesiénsia Matan Timor-Leste (AHDMTL), Gabriel Ponciano de Sousa, hateten liuhosi projetu foun ne’ebé apoiu hosi UE sei fó benefísia ba ema ho defisiénsia no membru LGBTQI+ iha munisípiu tolu ne’e.
“Projetu ida-ne’e sei fó Liberdade ba EhD no ita-nia maluk LGBTQI+ atu asesu ba informasaun ka atividade iha suku laran,” Gabirel dehan.
Diretór Jerál Sekretáriu Estadu Igualdade Inkluzaun (SEII), Armando da Costa, hateten liuhosi projetu ne’e bele proteje no asegura ema ho defisiénsia sira no mós maluk LGBTQI+ no sira sei livre hosi diskriminasaun oioin.
“Dala ruma limita atu hato’o sira-nia direitu no espresa sira-nia hanoin maibé ho projetu ne’e bele proteje sira no ema hotu sei kontribui ba dezenvolvimentu ida-ne’e ho di’ak no ita mós sei la husik ema ida iha kotuk,” nia dehan.
Jornalista : Osória Marques
Editór : Cancio Ximenes
