UNFPA-PM Taur diskute kestaun saúde inan no bebé
DILI, 10 marsu 2023 (TATOLI)—Diretora Rejionál ba Populasaun Nasaun Unidas (UNFPA), Bjorn Andersson, hasoru malu ho Primeiru-Ministru, Taur Matan Ruak, hodi diskute kona-ba kestaun saúde inan no bebé, joven no populasaun hodi hadi’a prestasaun servisu sentru saúde sira iha munisípiu.
Nia hateten, objetivu hosi diskusaun ne’e atu fornese atendimentu ne’ebé adekuadu ba inan isin-rua sira no sentru saúde bebé sira-nia moris.
“Ha’u hasoru Primeiru-Ministru, iha semana ne’e no ko’alia kona-ba investimentu iha setór saúde liu-liu inan isin-rua, labarik, foinsa’e no tinan kotuk sensu populasaun nian,” Bjorn Andersson, hateten liuhosi konferénsia imprensa ne’ebé realiza iha iha Hotel Timor, sesta ne’e.
Nune;e, nia dehan, bele hadi’ak servisu ne’ebé adekuadu iha sentru saúde sira no ajuda hamenus mortalidade inan no oan iha Timor-Leste.
Reprezentante UNFPA iha Timor-Leste, Perigozu Cabo, hateten UNFPA reabilita sentru saúde inan iha Atauro, Ermera, Liquiça no Manufahi.
“UNFPA reabilita ona sentru saúde inan no oan sira iha munisípiu sira no populasaun sira iha área rurál sei hetan benefísiu,” nia dehan.
Nia mós informa, UNFPA mós fornese formasaun abilidade ba profisionál saúde sira hodi fornese servisu ne’ebé adekuadu relasiona ho saúde inan no oan.
UNFPA fornese maizumenus $500,000 ba reabilitasaun sentru saúde inan no oan, sosa ekipamentu no tformasaun ba profisionál saúde sira.
Tuir dadus hosi Hospitál Nasionál Guido Valadares (HNGV) nian, iha tinan 2022, ema hamutuk 428 mak mate.
Jornalista : Osória Marques
Editór : Cancio Ximenes
