Governu presiza prioritiza estrada Maumali ba Bilimau
BOBONARO, 14 marsu 2023 (TATOLI) – Abitante sira hosi postu administrativu Cailaco, munisípiu Bobonaro, ezije VIII Governu Konstituisionál atu tau prioridade hodi rezolve estrada Urbana hosi diresaun Mau-Mali, suku Ritabou ba to’o Bilimau.
Fausto Gonçalves nu’udar joven hosi postu administrativu Cailaco, sente triste tanba iha tempu udan kondisaun estrada grave tebes hodi difikulta movimentasaun transporte públiku no privada inklui komunidade sira-ne’ebé lori produtu lokál atu asesu ba merkadu.
Notísia relevante: MOP presiza aselera projetu estrada urbana Cailaco
“Liuliu ita-nia inan isin-rua sira, ne’ebé mak kuandu atu partu, lori ba Maliana ne’e susar tebes, ne’ebé husu ba VIII Governu Konstituisionál atu haree ba asuntu estrada liga hosi Mau-Mali ba to’o Bilimau ne’e, tanba importante tebes mai ami,” nia ko’alia iha Cailaco, tersa ne’e.
Nia haktur, iha tempu okupasaun Indonézia kondisaun estrada refere di’ak hela, maibé hahú hosi Timor-leste restaura nia independénsia iha 2002 komesa aat, hahú hosi primeiru governu mai to’o mandatu VIII governu kosntituisionál besik remata ona mós seidauk hadi’ak.
Enkuantu iha tinan hirak liubá governu konsege tau prioridade atu rezolve preokupasaun komunidade nian, maibé iha gurpu individu balu mak impede nune’e Ministériu Obra Públika (MOP) deside projetu la implementa no muda fali ba munisípiu Manatuto.
Nu’udar joven ida hakarak hato’o mensajen badak aman veteranu sira, iha postu Cailaco hanesan aman ba postu Cailaco, atu koopera didi’ak ho juventude no komunidade sira oinsá atu haree asuntu kona-bá estrada ida-ne’e.
“Agora ita sente grave tebes ne’e, komesa ba oin ita hotu tenke hamutuk fó liman ba malu hodi buka took alternativu ne’ebé maka diak atu nune’e bele aselera estrada ne’e. Ha’u hanesan joventude iha postu Cailaco, sente triste relasiona ho estrada ne’ebé grave tebes, hosi Mau-Mali ba to’o Bilimau ne’e, tanba difikulta tebes ami,” nia katak.
Deolino dos Santos Marçal nu’udar abitante, esplika, estrada refere autoridade postu no suku sira halo proposta beibeik ba governu lokál no nasionál, maibe to’o agora estrada ne’e sei kontinua falun ho rai-rahun no tahu-dodok.
“Ita sente hanesan la hela iha nasaun ida, tanba agora komunidade sira atu halo movimentu ba-mai araska la halimar, tanba movimentu hosi postu ba munisípiu ne’e estrada la di’ak, tán ne’e rekomenda ba nai-ulun sira atu nune’e iha eleisaun parlamentár ne’e maizumenus ida ka rua, mai haree netik estrada ne’e,” nia katak.
Enkauntu tuir dadus monografia Autoridade Munisípiu Bobonaro iha tinan 2022, postu administrativu Cailaco iha suku ualu ho totál populasaun 10,347, komposta hosi mane 5,246 no feto 5101 ho totál xefe família 2,107.
Notísia relevante: IGE mobliza ona ekipamentu halo normalizasaun mota iha Cailaco
Jornalista : Sergio da Cruz
Editór : Evaristo Soares Martins
