DILI, 22 marsu 2023 (TATOLI)-Prezidente Parlamentu Nasionál, Aniceto Longuinhos Guterres, hateten dauduan ne’e, meza parlamentu nasionál seidauk re-ajenda oráriu atu halo diskusaun hodi altera lei pensaun vitalísia tanba bankada Parlamentár sira to’o oras ne’e seidauk pronúnsia buat ruma liga ho alterasaun ne’e.
“Hau aprezenta ba reuniaun lidér bankada se sira ida-idak la pronúnsia, hau la bele obriga tau iha ajenda, sira nein ida pronúnsia,” Prezidente PN ne’e hateten ba jornalista sira iha PN, kuarta ne’e.
Notísia Relevante :Governu seidauk simu proposta alterasaun Lei Pensaun Vitalísia hosi PN
Prezidente Parlamentu rasik kria ajenda dala rua atu halo reuniaun ho lidér bankada sira hodi konsulta kona-ba polítika alterasaun lei ne’e molok aprezenta hikas iha plenária.
Maibé to’o oras ne’e, bankada parlamentár sira seidauk pronúnsia buat ruma ba meza PN hodi re-ajenda iha diskusaun plenária.
Antes ne’e, iha loron 30 fulan-janeiru tinan ne’e, Parlamentu Nasionál liu hosi reuniaun plenária hahú halo ona diskusaun ba proposta lei Rejíme Jurídiku Seguransa Sosiál Titulár Órgaun Soberania (alterasaun lei pensaun vitalísia) ne’e iha faze jeneralidade.
Maibé iha apresiasaun polítika deputadu balun espresa atu vota kontra, no maiória hakarak fó hikas proposta alterasaun ne’e ba governu atu hadi’a, nune’e meza plenária deside hodi re-enkamina ba governu hodi halo armonizasaun ba alterasaun lei ne’e tuir sujestaun deputadu sira.
Iha plenária deputadu sira preokupa liliu iha lei ne’e define tiha órgaun soberania sira atu hanesan ho funsionáriu públiku.
No Prezidente Repúblika ninia grau rekoiñesimentu iha prosesu rejime ne’e atu tau fila-fali iha seguransa sosiál, ne’e konsidera hanesan ho funsionáriu bai-bain.
Tanba ne’e maka bainhira lei pensaun vitalísia foun ne’e aprovadu maka otomatikámente lei pensaun vitalísia tuan sei la funsiona, oinsá ho eis tituláres sira ne’ebé daudaun ne’e simu ona pensaun ne’e?, sira sei lakon ona diretu ka submete ba lei pensaun vitalísia foun ne’e?.
Vise Ministra Solidariedade Sosiál no Inkluzaun (MSSI) Signi Chandrawati Verdial, responde katak bainhira proposta alterasaun lei pensaun vitalísia foun ne’e aprova maka eis tituláres sira sei la iha diretu atu simu pensaun tuir lei tuan ne’e maibé tenke submeter ona ba lei foun.
Problema seluk tan ne’ebé maka deputadu sira kestiona kona-ba regra implementasaun tuir lei foun ne’e ba Deputadu ho Ministru sira foun de’it ka inklui sira tuan, no mós oinsá ho ninia klasifikasaun? ne’ebé halakon tiha direitu ho lei foun ne’e atu rezolve óinsa, no mós kestaun seluk tan.
Ho kestaun hirak ne’e maka Parlamentu Nasionál fó fila proposta lei ba Governu hodi reformula tuir sujestaun ne’ebé iha, maibé parte Governu argumenta ona katak atu hadi’a lei ne’e PN presiza hato’o rekomendasaun espesífiku liuhosi hosi komisaun A.
Nune’e, Prezidente PN, Aniceto Guterres, konsulta kedas ho baze legál sira laiha provizaun ida ne’ebé klara, espresamente fó dalan atu inisiativa ka proposta lei ne’e bele fó fila ba Governu, entaun atu re-ajenda diskusaun iha plenária sei hein reuniaun lidér bankada sira hodi halo konsultasaun.
Notísia Relevante :Deputadu maiória lakohi altera lei pensaun vitalísia
Jornalista: Nelson de Sousa
Editór: Agapito dos Santos
