iklan

NASIONÁL, ELEISAUN, HEADLINE

STAE husu Prezidente Repúblika tetu alterasaun Lei Eleitorál ba ElPar

STAE husu Prezidente Repúblika tetu alterasaun Lei Eleitorál ba ElPar

Diretór-Jerál STAE, Acilino Manuel Branco. Imajen Tatoli/Egas Cristóvão.

DILI, 27 marsu 2023 (TATOLI) – Diretór-Jerál Sekretariadu Tékniku Administrasaun Eleitorál (STAE), Acilino Branco, husu Prezidente Repúblika, José Ramos Horta, atu tetu alterasaun Lei Eeleitorál ba Eleisaun Parlamentar (ElPar) 2023.

“Ami-nia esperansa mak Prezidente Repúblika tetu took ba, maibé teknikamente ami hanoin katak alterasaun Lei Eleitorál ne’e sei tulun tebes no minimiza preokupasaun eleitór sira iha eleisaun mai ne’e,” Acilino Branco hatete iha ámbitu abertura formasaun ba fasilitadór STAE, iha Delta Nova, segunda ne’e.

Nia esplika, liga ho altersaun lei ne’e, jornalista no sidadaun sira mós sei la vota iha kualkér fatin no sei fila bá idak-idak nia unidade geográfika mak bele vota, tanba laiha alternativu seluk atu vota livre.

Tuir responsavel, preokupasaun eleitór nian mak STAE liuhusi Ministériu Administrasaun Estatál (MAE) hamutuk ho lejizlativu propoin pontu balun hodi fasilita sidadaun sira vota livre, maibé Xefe Estadu veta. “Espera iha reenvia proposta hosi Parlamentu Nasionál ne’e, Prezidente Repúblika tetu no bele promulga, nune’e fasilita eleitór sira”.

Mudans Lei Eleitorál ne’e Governu introdús medida foun sira hanesan estabelese sentru votasaun paralelu iha Dili no medida eleitór sira sei ba rejista direta iha STAE, estabelese votu postál iha rai-li’ur, jornalista sira bele vota livre bainhira iha tempu eleisaun hala’o papél sira iha ne’ebé de’it, oráriu eleisaun, monitór observadór iha eleisaun, kria kondisaun ba ema ho defisiénsia atubele partisipa di’ak liután iha sufrájiu.

Ministru Administrasaun Estatál, Miguel Perreira de Carvalho, dehan alterasaun ne’e ho razaun atu armoniza Lei Eleitorál Prezidente Repúblika no Parlamentu Nasionál nian hodi hasa’e taxa partisipasaun eleitór iha eleisaun mai, nune’e Governu hanoin ida ne’e importante tebes.

Lembra katak Prezidente Repúblika, José Ramos Horta, veta lei eleitorál tanba votasaun paralela. Desizaun ne’e halo bazeia ba pedidu hosi partidu polítiku sira.

Iha 20 marsu, Parlamentu Nasionál (PN), liuhosi reuniaun plenária, fó ona votu konfirmasaun ba dekretu n.u 78/V PN-alterasaun dalimak lei n.u 6/2006, 28 dezembru, lei eleitorál ba PN, hodi haruka filafali ba Prezidente Repúblika atu halo promulgasaun.

Depois deputadu sira halo votu konfirmasaun, Xefe Estadu iha prazu loron ualu nia laran atu halo promulgasaun ba alterasaun lei ne’e.

Notísia relevante: PN sei  fó fila-fali alterasaun lei eleitorál ba PR

Jornalista: Osória Marques

Editora: Maria Auxiliadora

iklan
iklan

Leave a Reply

iklan
error: Content is protected !!