Negosiante munisípiu husu Governu atu kria kondisaun hodi buka moris
DILI, 29 marsu 2023 (TATOLI)—Negosiante hosi munisípiu Viqueque, Abel da Silva, husu Governu atu kria kondisaun ba negosiante sira hosi munisípiu.
“Ami husu ba Governu atu tau-matan mai ami, hodi ami povu kiik bele buka moris ho di’ak no hakmatek. Presiza kria fatin ba ami negosiante hosi munisípiu sira tanba durante faan laiha fatin ida ba ami hodi faan no loro-loron duni ami ba-mai de’ít,” nia dehan ba jornalista sira, iha merkadu Taibesi, kuarta ne’e.
Tanba, nia hateten, durante semana ida ona iha ne’e maibé sasán la folin, ema la hola tanba ekipa jestaun duni hela de’it.
“Ha’u mai fa’an bua no ha’u iha ne’e semana ida ona, maibé ema lahola tanba ekipa jestaun merkadu duni hela de’it ami tun-sa’e deít. Dehan kapitál Dili mak fatin ne’ebé munisípiu hotu-hotu konsentra hodi buka moris, maibé ami iha ne’e fa’an ladi’ak tanba seguransa sira duni ami ba-mai no dehan fatin iha merkadu laran mós laiha, entaun ami ba ne’ebé loos,” nia hateten.
Entretantu, negosiante hosi munisípiu Ermera, Carlito Fernandes, timoroan ida mak fa’an sasán iha nia rain rasik maibé sente hanesan ema seluk no sente seidauk ukun an tanba moris la hakmatek.
“Ha’u mai fa’an bua ho malus de’it maibé duni hela de’it no dehan fatin laiha, entaun ami ba ne’ebé. Dehan Dili osan barak ne’e mak ita tuun mai faan, agora ekipa jestaun duni beibeik, uluk terus ne’e mak hakarak ukun an hodi moris di’ak maibé aat liu fali,” nia dehan.
Koordenadór Jestaun Merkadu Taibese, Munisípiu Dili, António Manuel de Araujo, hateten ekipa hala’o tuir lei no orden ne’ebé iha, nune’e bainhira negosiante ida mak faan iha terminál, trotoar ka estrada laran ekipa sei hasai.
“Ekipa jestaun merkadu iha munisípiu Dili hala’o nia kna’ar tuir lei jestaun merkadu ba vendedór sira-ne’ebé utiliza fatin hodi halo negósiu maibé ekipa jestaun halo mudansa ba fatin sira-ne’ebé iha ona balkaun ne’ebé Governu prepara ona sira hodi halo negósiu labele faan fali sasán iha trotoar leten, estrada laran, terminál,” nia hateten.
Ekipa jestaun kontinua halo kontrolu ba fatin ne’ebé Governu bandu no kontinua halo prevensaun, nune’e labele faan no tenke ba faan fatin ne’ebé Governu prepara ona.
Ba vendedór sira hosi munisípiu ne’e, nia dehan, faan sasán tenke lori tama ba balkaun laran mak faan ba la’ós iha terminál laran, se iha li’ur mak jestaun merkadu sei hasai.
“Sira hosi munisípiu ne’e konsidera hanesan vendedór provizóriu no laiha fatin tanba sira mai halo tranzisaun de’it no faan tutan ba vendedora permanente iha merkadu ne’e. Maibé bainhira sasán hotu kleur entaun tenke tama iha balkaun’, nune’e evita engarafamentu iha terminál. Entaun, bainhira ekipa jestaun avizu mak ba sira mak la rona ekipa jestaun tenke halo apreensaun no sei haruka ba ema vulneravél sira,” nia dehan.
Jornalista : Osória Marques
Editór : Cancio Ximenes
