Veteranu sira presiza kontribui ba prosesu dezenvolvimentu

MALIANA, 13 abríl 2023 (TATOLI) – Administradór postu administrativu (APA) Cailaco, munisípiu Bobonaro, Alfredo Meta-Dau, husu ba veteranus sira iha Cailaco atu kontribui ba dezenvolvimentu ne’ebé governu implementa hahú iha nivél postu to’o aldeia.

Administradór Meta-Dau, hato’o kestaun ne’e tanba tinan hirak kotuk iha veteran balu halo impedimentu ba projetu estrada urbana Cailaco, hahú hosi Mau-Mali ba to’o Bilimau ne’ebé baliza entre Cailaco ho postu administrativu Atsabe, munisípiu Ermera.

Notísia relevante: MOP presiza aselera projetu estrada urbana Cailaco

“Ha’u-nia maluk veteranu sira presiza kontribui ba iha prosesu dezenvolvimentu, la’ós tempu ona ita atu ba halo impedimentu, maibé tempu ida ita hamutuk atu loke espasu atu dezenvolvimentu ne’e bele la’o iha ita-nia rai,” nia informa ba jornalista sira, iha edifísiu administrasaun autoridade Bobonaro, kinta ne’e.

Maibé lideransa postu administrativu ne’e fiar katak veteranu sira sei koopera, tanba durante nia mandatu tinan ida liu ona sempre buka tuir rezisténsia atu hametin unidade hodi loke dalan dezenvolvimentu ne’ebé sei mai iha futuru.

“Estrada ne’e aat hosi Bilimau mai to’o Maliana, maibé ne’e konsekuénsia ida, labele repete fila-fali, ita tenke hateke. Ida-ne’e mak ita atu halo, ita labele kulpa fali ba buat-ne’ebé ke liu tiha ona, ne’e ladiak,” nia hateten.

Nia fundamenta, dezde Timor-Leste ukun-aan to’o agora povu Cailaco sempre preokupa infraestrutura bázika hanesan bee-moos, eletrsidade liuliu estrada, tanba antes ne’e governu muda fali projetu estrada refere ba munisípiu seluk.

Nia parte mós submete ona pedidu ba obra públika munisipál Bobonaro no tuir informasaun katak iha ona prosesu elaborasaun dezeñu Bill Off Quatitaty (BOQ) hosi Ministériu Obra Públika.

“Maibé la hatene bainhira mak remata nia dezeñu ho BOQ, ba to’o prosesu tuir mai ne’e kompeténsia sira governu sentrál nian, maibé ita sempre propoin katak tenke aselera, karik governu foun mai mós tenke kontinua obra ida-ne’e, atubele iha susesu no rezultadu, tanba povu hein kleur ona,” nia hateten.

Enkuantu tuir dadaus monografia autoridade munisípiu Bobonaro, postu administrativu Cailaco, iha aldeia 24, suku ualu ho totál populasaun 10,347, postu hosi mane 5,246 no feto 5,101 ho totál xefe família 2,107.

Notísia relevante:Rai-rahun falun estrada Cailaco provoka komunidade sofre moras IRA

Jornalista   : Sérgio da Cruz

Editór          : Evaristo Soares Martins