PDHJ preparadu halo monitorizasaun ba Eleisaun Parlamentár 2023
DILI, 17 abríl 2023 (TATOLI)—Providór Direitu Umanu no Justisa (PDHJ), Virgílio da Silva Guterres, hateten PDHJ preparadu atu halo monitorizasaun ba Eleisaun Parlamentar hahú hosi atividade kamapaña eleitorál (19 abríl) to’o realiza eleisaun iha 21 maíu 2023.
“Iha eleisaun parlamentár, ekipa monitorizasaun preparadu ona no posivelmente ohin ofisialmente lansa nune’e hodi destaka tuir planu ne’ebé iha. Apoiu delegasaun territoriál iha haat mak RAEOA, Baucau, Same ho Maliana,” nia dehan ba jornalista sira, hafoin partisipa diskusaun públiku kona-ba “Direitu Prizioneiru hodi asesu ba justisa formál” iha salaun JL Vila, segunda ne’e.
PDHJ sei apoiu mós hosi nasionál nian, nune’e oinsá halo kobertura ne’ebé másimu maske rekursu limitadu ne’ebé sei la kobre territóriu tomak, maibé sei buka atu identifika hodi mobiliza tan tuir PDHJ nia haree katak bele mosu infrasaun ruma ne’ebé relasiona ho violasaun direitu umanu no violasaun kontra boa-governasaun nian.
“Ho ida-ne’e ami mós hetan ona patrimóniu Estadu nian hamutuk lima nune’e hodi bele fasilita PDHJ nia atividade. Iha atividade ne’e ami sei la la’o tuir partidu ida-idak tama sai uma maibé sei haree partidu polítika sira-ne’ebé kaer ukun hela ne’e dala barak iha tendénsia uza sala patrimóniu Estadu. Entaun ida-ne’e, PDHJ tau-matan,” nia dehan.
PDHJ sei halo komunikasaun ho órgaun eleitorál sira hanesan STAE no CNE hodi oinsá garante prosesu kampaña eleitorál ne’ebé armoniza no partidu polítiku sira tenke iha preferénsia atu aprezenta programa polítiku.
Jornalista : Osória Marques
Editór : Cancio Ximenes
