DILI, 22 abríl 2023 (TATOLI) – Prezidente Repúblika (PR), José Ramos Horta, sente preokupadu tanba lider partidu polítiku sira balun hadai liafuan ne’ebé ataka malu iha kampaña eleisaun lejislativa.
“Líder sira iha kampaña kontinua atake malu, ida ne’e CNE mak tenke haree, maibé ha’u haree, ha’u rejista, tanba ha’u preokupa ho kualidade lideransa ho kualidade governasaun”, PR Horta hateten ba jornalista sira iha Embaxada Indonézia, Faról, sábadu ne’e.
Tanba ne’e, Xefe Estadu husu atu lideransa partidu polítiku sira atu evita lianguajen ne’ebé atake malu no óinsa bele promove nafatin dame.
“Ha’u mak sei fó posse ka la fó pose ba Primeiru-Ministru, ha’u mak fó posse ka la fó pose ba koligasaun ruma, ha’u mak fó pose ka la fó pose ba ministru sira, se líder ida ka kandidatu ida, ha’u haree ko’alia mamuk loos, la ko’alia buat ida no la fó garantia ba ha’u partidu ne’e ba Governu bele kontribui ba dame, haklean demokrásia ha’u bele la fó pose, ida ne’e mak ha’u aviza”, Horta apela.
Kampaña eleitorál hahú iha 19 abríl no eleisaun parlamentár sei akontese iha loron 21 fulan maiu 2023. Tuir lista ne’ebé Tribunál Rekursu fó sai hamutuk 17 mak sei kompete iha eleisaun parlamentár tinan ne’e.
Jornalista: Nelson de Sousa
Editór : Zezito Silva
