LAUTÉM, 27 abril 2023 ( TATOLI)- Estudante hamutuk 830 sei hetan direitu ba bolsa méritu iha Munisípiu Lautém, Diretór Servisu Edukasaun Munisípiu Lautem, Rui Manuel Miranda da Costa relata.
“Estudante hamutuk 830 maka hetan mellor klasifikasaun, ho nune’e ami avizu ona ba sira-nia inan aman hodi submete estudante sira-nia konta bankária nune’e Ministériu Edukasaun Juventude no Desportu (MEJD) bele halais pagamentu ba estudante ida- idak nia konta bankaria, maibé benefisiáriu husi estudante 830 ne’e, 500 mak iha ona konta bankaria ho nune’e Servisu Edukasaun Munisípiu Lautém submete ona ba MEJD hodi prosesa sira-nia direitu pagamentu, entertantu 330 mak to’o agora sira-nia inan aman seidauk hatama númeru konta bankaria ba Servisu Edukasaun Munisípiu Lautém,” Diretór Rui Manuel ba TATOLI iha nia servisu fatin Lospalos Vila iha kinta ne’e.
Ezekutivu ne’e haktuir, maski 330 estudante benefisiáriu hirak ne’e seidauk hatama konta bankaria, maibé Servisu Edukasaun Munisipál sei esforsu nafatin hodi nune’e sira bele hetan sira-nia direitu iha tempu-badak.
“Servisu Edukasaun Munisípiu Lautém sei servisu hamutuk ho diretór eskola sira hodi buka meus atu komunika nafatin ho estudante nain 330 nia inan-aman atu kolabora hamutuk hodi bele prosesa sira-nia direitu ba bolsa méritu ne’e” nia akresenta.
Diretór ne’e mós reforsa katak Servisu Edukasaun Lautém nia dever mak rekolla dadus ba bolsu méritu sira no laiha direitu atu loke konta bankaria ba sira, tanba ne’e husu nafatin inan-aman sira hodi halais dokumentu sira no submete ba Servisu Edukasaun .
Entretantu, antes ne’e Ministru Edukasaun Juventude no Desportu, Armindo Maia hateten, sei prosesa pagamentu ba estudante benefisiáriu bolsa méritu ne’ebé iha ona konta bankaria iha tempu-badak.
Journalista: Camilio de Sousa
Editora. : Nelia Borges
