DILI, 29 abril 2023 (TATOLI) – Asosiasaun Arte no Kultura Timor Furak realiza kompetisaun moda Tais nu’udár espasu no oportunidade ba labarik sira bele promove sira-nia talentu iha públiku no promove tais nu’udár Timor-Leste nia identidade.
Koordenadór Asosiasaun Arte no Kultura Timor Furak, Olivio Euklides dos Santos informa, eventu kompetisaun Tais ba Labarik ne’e realiza bala-rua; kompetisaun moda Tais ba labarik feto no mane ho kategoria A idade hosi 3 até 7 no ba kategoria B husi idade 7 até 13. Eventu kompetisaun ne’e nia objetivu kria espasu hodi fó oportunidade ba labarik sira brani hatudu sira-nia talentu iha públiku hanesan la’o iha palku. Bele mós promove sira-nia talentu no fó koinesimentu moda tais ba jerasaun foun sira para hahú agora sira koinese kedas Tais nu’udár Timor-Leste nia identidade.
“Ami Asosiasaun Arte no Kultura Timor Furak iha obrigasaun para kontinua promove ba komunidade enjerál no ami hakarak hahú hosi jerasaun ki’ikoan sira”, Koordenadór Asosiasaun Arte no Kultura Timor Furak, Olivio Euklides dos Santos hateten, iha Timor Plaza, sábadu ne’e
Totál kontestante sira partisipa iha kompetisaun moda Tais ba tinan ida ne’e hamutuk labarik 120. Ba kategoria A nian kontestante maizumenus 60 no ba kategoria B nian kontestante 60.
Iha prosesu kompetisaun ba ne’ebé ba pasa ba finál, domingu 30 abril 2023 nian hosi kategoria A no B ne’e ekipa juri no komisaun sei hili ema nain 14 hosi kategoria A no 14 hosi kategoriaa B hamtuk 28 sei tama ba semi-finál nian.
Ba finál , komisaun no ekipa juri sei hili de’it na’in haat maka sai hanesan vensedór grupu kategoria A no nain haat seluk vensedór ba kategoria B nian, hamutuk sira na’in ualu maka sei sai vensedór moda Tais ba labarik tinan 2023 nian.
Nia vensedór kategoria A na’in maka hanesan, vensedór primeiru, segundu, terseiru no mós vensedór favoritu no implementa mós ba iha kategoria B nian sai vensedór primeiru, segundu, terseiru no vensedór favoritu.
“Métode sira ne’ebé utiliza trasparansia tebes, bainhira kontestante sira aprezenta hotu ekipa juri hi’it kedas pontu valór ba kada kontestante sira”, koordenadór Timor Furak dehan.
Kritériu sira ne’ebé ekipa juri sira haree iha kompetisaun ne’e hanesan elentu inovativu no kreativu, kostum nia detallu, labarik nia karatéristika ho orijinalidade liga ba impaktu audénsia. “Aspetu sira ne’e mak sai hanesan sasukat ida ba pontus ba kontazen nian” Olivio Euklides dos Santos reforsa.
Vensedór sira sei hetan premiu osan direta hosi BNCTL, maibé organizadora eventu koordena ho BNCTL no orienta vensedór sira atu loke konta bankaria iha hodi nune’e BNCTL bele halo transfere ba sira-nia konta rasik.
“Ida ne’e parte ida hosi edukasaun atu hanorin alin sira atu bele halo poupansa ba sira osan rasik hanesan premiu ne’ebé sira hetan daudauk”, nia hateten.
Alende ne’e sira hetan prémiu telemovel, roupa, prémiu sertifikadu ho kategoria sira ne’ebé maka la hanesan. “Ha’u-nia observasaun antuziasmu tebes hosi labarik sira no agradese família sira-nia apoiu ba eventu kompetisaun ida ne’e no ami hanoin kompetisaun moda Tais ba labarik sira ne’e bele halo tinan-tinan”.
Iha parte seluk, Reprezentante família, Filomena de Jesus da Costa kontente no haksolok ho ba kompetisaun Moda Tais ne’e parte ida hanesan atu promove Tais Timór ba labarik sira. “Ha’u-nia oan lakon iha kompetisaun ida ne’e, ami família simu nafatin tanba ne’e esperiénsia ba labarik sira. Ha’u hakarak promove ita-nia Tais ne’e sai furak liutan”, Reprezentante família, Filomena de Jesus da Costa tenik, hafoin lori nia oan tuir tiha kompetisaun moda Tais iha Timor Plaza.
Alende ne’e, Kontestante Moda Tais, Efifania da Costa Silva ho idade 12 sente kontenti tuir eventu Kompetisaun Moda Tais ne’e maske sei manan ka lakon.
“Ha’u-nia hakarak kompetisaun ida ne’e bele loke fali iha tinan oin tanba ami barak mak hakarak tuir kompetisaun ne’e”, kontestante ne’e espera, hafoin tuir kompetisaun moda Tais tinan 2023 iha Timor Plaza Dili.
Tuir observasaun, Kompetisaun moda Tais ba Labarik hetan partisipasaun másimu husi família sira inklui públiku enjerál entuziazmu partisipa no asiste evente ne’e. Atividade kompetisaun ne’e hala’o durante loron rua, hahú sábadu to’o domingu.
Jornalista : Francisco Sony
Editór : Rafael Ximenes de A. Belo
