CASDT hakarak dezenvolve irrigasaun iha Maliana
MALIANA, 01 maiu 2023 (TATOLI)-Partidu Sentru Asaun Sosiál Demokrátika Timorense (CASDT) ho númeru sorteiu (13) segunda ne’e, hala’o mini-kampaña eleitorál iha Mau-Mali, suku Riatbou, postu administrativu Maliana, munisípiu Bobonaro.
Prezidente CASDT, Isaac do Rosário, hateten Maliana iha rai-bokur no poténsia boot ba setór agrikultura, liuliu natar, maibé durante ne’e iha tempu bai-loron, rai barak mak abandona tanba problema irrigasaun ladi’ak nune’e labele fornese bee ba natar.
Notisia relevante: CASDT promete uza fundu mina-rai hakbiit povu nia ekonómia
“Ita haree agrikulór sira prodús hare ne’e só fulan tolu de’it, ida-ne’e araska la halimar, entun povu fó konfiansa ba partidu CASDT hakat barreira sei ko’alia iha parlamentu ho Governu katak tenke ser kria irrigasaun ida ke di’ak, kapaas atu nune’e fornese bee nee bele tama iha natar hodi hasa’e produsaun, liuliu hare,” nia informa ba Jornalista sira, hafoin halo diáloguu ho militante sira iha Mau-Mali.
Setór agrikultura sai fatór importante ba programa CASDT, tanba ne’e sei kria mós merkadu ida-ne’ebé di’ak ba negosiante sira iha Maliana vila nune’e bele hetan redimentu hodi sustenta nesesidade família.
Nia promete bainhira hetan konfiansa hosi povu, CASDT kria mós mini merkadu iha fronteira nune’e roda ekonomia bele sirkula ho di’ak.
Atu dezenvolve setór ekonomia la’o ho di’akak, CASDT mós sei defende polítika desentralizasaun administrativa no podér lokál, nune’e bele fó podér governu lokál bele la’o.
“Poder lokál ne’e la’o, entaun rekrutamentu funsionáriu ne’e maka’as tebes, enkaisa hotu ba iha diresaun ne’ebé iha munisipál, entaun osan ne’ebé funsionáriu sira hetan hosi saláriu, sira bele hola povu nia modo-tahan, ai-fuan, entaun osan ne’e sirkula ona iha munisípiu maka rendimentu ekonomia ita-nia povu mós di’ak,” nia katak.
Notisia relevante: CASDT defende polítika desentralizasaun administrativa no podér lokál
Jornalista: Sergio da Cruz
Editór: Evaristo Soares Martins
