KHUNTO promete hadi’ak irrigasaun no konstrui barrajen iha Bobonaro
MALIANA, 04 maiu 2023 (TATOLI)-Prezidente Partidu Kmanek Haburas Unidade Nasionál Timor Oan (KHUNTO), Armanda Berta dos Santos, promete, bainhira povu fó fiar iha eleisaun parlamentár no envolve iha governasaun foun, sei tau prioridade hadi’ak irrigasaun no konstrui barrajan iha munisípiu Bobonaro, liuliu iha postu administrativu Maliana.
Prezidente Partidu KHUNTO, hato’o kompromisu polítiku ne’e iha kampaña eleitorál ho tipu komísiu iha kampu futeból Maliana, munisípiu Bobonaro, sesta ne’e.
KHUNTO hakarak tau prioridade atu hadi’ak irrigasaun sira iha munisípiu Bobonaro tanba iha kapitál Maliana rai-luan, bokur no poténsia ba natar dezde uluk to’o agora.
Notisia Relevante: KHUNTO investe rekursu umanu no hasa’e salariu mínimu ba traballadór
“Iha Maliana maioria agrikultór, irrigasaun sira hotu-hotu tenke di’ak, atu ita-nia povu bele halo natar ho di’ak, atu nune’e ita labele dependente nafatin ba importasaun hosi rai-li’ur,” Berta hateten.
Membru Partidu KHUNTO atuál Ministru Agrikultura no Peska, Pedro dos Reis ,hateten durante mandatu iha VIII governu konsege rezolve ona problema irrigasaun Iha postu administrativu Cailaco no irrigasaun Maliana II.
Alende ne’e hadi’ak mós kondisaun irrigasaun Galata no Laivai, maibé esforsu hirak l-ne’e sei la to’o.
Tanbá ne’e bainhira KHUNTO ba ukun tán dala ida sei halo barrajen hodi fornese bee natar.
“Irrigasaun sira-ne’ebé ita halo ita depende de’it ba udan-been, entaun tenke halo barrajen ba futuru. Udan-been kuandu mai, ita la husik ba mota, maibé trava udan-ben atu nune’e área kultiva boboot sira-ne’e ita bele kolleta dala-rua,” nia promete.
Kona-bá irirgasaun Maliana II, nia dehan, agora governu halo hela negosiasaun ho nasaun viziñu Indonézia atu fahe bee ba malu ho hanesan hosi agrikultór nasaun rua ne’e bele halai natar.
Notísia Relevante: KHUNTO prioriza setór turizmu hodi subtitui Fundu Petrolíferu
Jornalista: Sergio da Cruz
Editór: Evaristo Soares Martins
