Autoridade Tirilolo hahú halo reabilitasaun sede suku
BAUCAU, 09 maiu 2023 (TATOLI) – Sede suku Tirilolo, postu administrativu Baucau Vila hahú halo reabilitasaun liuhosi Programa Nasionál Dezenvolvimentu Suku (PNDS).
Xefe suku Tirilolo, Ricardo Ernesto Belo, esplika, projetu refere implementa hosi atividade Reabilitasaun Sede Suku (RSS) PNDS ne’ebé hahú iha fulan-abríl no tuir planu sei finaliza iha fulan-jullu.
“Bainhira finaliza bele ona fasilita atu halo atendimentu ba komunidade, maibé provizoriumente ita sei utiliza aula enkontru,” Xefi suku Tirilolo informa ba Agência TATOLI iha Vila Antiga, tersa ne’e.
Totál orsamentu aloka ba projetu refere hamutuk rihun $13-resin ne’ebé aloka ba item tolu hanesan kustu badaen, materiál lokál no fabrikadu.
Sede suku refere konstrui iha tempu okupasaun Indonézia ne’ebé hetan estragu no presiza reabilita liuliu kondisaun kalen, odamatan, janela no didin.
“Depende ba alokasaun orsamentu, importante mak estragus sira bele troka no hadi’a,” Ricardo Belo akresenta.
Autoridade suku konsidera projetu refere implementa tarde relasiona ho orsamentu, maske nune’e daudaun ne’e konsege realiza no sei finaliza iha tempu besik.
Suku Tirilolo komposta hosi aldeia neen hanesan Betulale, Caisido, Lutumutu, Lialailesu, Parlamentu no Osso-ua ho totál populasaun 9.789 hosi uma-kain 2.031
Jornalista : Natalino Belo
Editór : Evaristo Soares Martins
