MALIANA, 08 maiu 2023 (TATOLI) – Prezidente Kámara Komersiu Timor-Leste (CCI, sigla portugés) Munisípiu Bobonaro, Santina Mafalda husu ba Prezidente Autoridade, Ernesto de Oliveira Barreto, atu uza nia kompeténsia másimu hodi regula sidadaun xinés sira-ne’ebé daudaun ne’e loke negósiu kiik to’o aldeia sira.
Deklarasaun ne’e hato’o husu Prezidente CCI Munisípiu Bobonaro hafoin ho estrutura sira halo audiénsia ho Prezidente Autoridade Munisípiu Bobonaro, Ernesto de Oliveira Barreto, tersa ne’e ligadu ho sidadaun xinés ida, hahú loke investimentu fabrika batako iha área Mau-Mali, suku Ritabou, ne’ebé ke timoroan sira mós bele halo.
Notísia relevante: Terra no Propriedade Bobonaro laiha koñeseimentu ba empreza Hong Takhacay sosa rai iha Mau-Mali
“Ha’u ho ha’u-nia estrutura mai hasoru malu ho prezidente autoridade, ami ko’alia liu kona-bá xinés sira loke ona batako iha Mau-Mali, oinsá ho prezidente autoridade hamutuk atu kria regra ida regula sira,” nia informa ba jornalista sira, iha edifísiu administrasaun Maliana, kuarta ne’e.
Mafalda hatutan, iha sorumutuk ne’e mos dikute kona-bá kestaun Programa Nasionál Dezenvolvimentu Suku (PNDS) ne’ebé fó ba xinés sira prenxe kuotasaun hodi distribui materiál ba projetu ne’ebé implementa iha suku no aldeia.
“Tanba kuotasaun PNDS ne’e fó benifísiu tebes ba xineza sira, maibé natureza PNDS ne’e atu fó moris ba emprezáriu lokál sira, la’ós fó ba xinés sira, tanba xina sira kredit hela iha sira-nia nasaun, entaun sira mai buka osan iha ita-nia rai hodi hetan lukru,” nia hateten.
Hatán ba preokupasaun ne’e, Pezidente Autoriade Munisípiu Bobonaro, Ernesto de Oliveira Barreto, hateten nia parte sei levanta kestaun ne’e iha reuniaun konsellu konsultivu munisipál atu nune’e bele hola medida ruma.
Maibé nia parte orienta ona ekipa fiskalizasaun ba kedas terrenu hodi observa empreza refere nia atividade, inklui haree dokumentu legál sira hanesan lisensa negósiu no dokumentu rai.
“Sira sei lori dukumentu mai iha-ne’e, atu haree provizoriamente bele hapara lai sira-nia servisu ne’e, tanba atu loke empreza ida la’ós loke mak uluk depois maka trata lisensa, agora ninia lisensa ne’e ba terrenu, nia tenke halo pedidu mai Prezidente Autoridade depois fó despaxu ba diretór terra, maibé hau la hatene sira halo ka lae,” nia hateten.
Lideransa munisípiu Bobonaro ne’e haklaken, tuir lei ne’ebé vigora katak ema estranjeiru só bele halo investimentu rihun $100 ba leten maibé hosi montante ne’e mai kraik emprezáriu nasionál ho lokál mak iha direitu atu halo.
Enkuantu kona-bá kestaun PNDS fó oportunidade ba xinés sira prienxe kuotasaun, Prezidente Autoridade munisípiu ne’e afirma, ba oin sei hapara totál.
Notísia relevante: APMT sei konstroi Estrada diresaun Gleno-Atsabe-Bobonaro
Jornalista : Sérgio da Cruz
Editór : Evaristo Soares Martins
