LAUTÉM, 09 maiu 2023 (TATOLI)- Ensinu Báziku Filiál (EBF) 30 de Agosto, atualmente, nia kondisaun grave nune’e prejudika ativida ensinu aprendizajen iha estabelesimentu ensu ne’e.
Diretór Ensinu Báziku Filíal 30 de Agustu, Abril Ximenes, informa Eskola refere seidauk hetan reabilitasaun husi Governu, tanba ne’e afeta maka’as ba prosesu aprendizajen durante tempu udan.
Eskola ida ne’e, tuir Diretór Abril Ximenes, harii iha tinan 2000 no agora daudaun nia kondisaun fíziku kuaze aat hotu ona, maibé sedauk hetan reabilitasaun to’o agora.
“Ami-nia eskola kuaze at hotu ona, uainhira tempu udan, bee turuk husi leten no borus iha sala laran, afeta maka’as ba prosesu aprendizajen,” Diretór Ensinu Báziku Fílial 30 de Agusto, Abril Ximenes hateten ba TATOLI iha nia edifísiu Nakroman Lospalos, tersa ne’e.
Dirijente ne’e relata, parte eskola submete ona proposta ba Servisu Edukasaun Munisípiu Lautém maibé to’o agora seidauk simu resposta husi Ministériu Edukasaun, Juventude no Desportu (MEJD) kona-ba rehabilitasaun eskola ida ne’e.
“Ami submete proposta dala tolu ona husi 2015, 2017 no 2020, ba Servisu Edukasaun Munisípiu Lautém hodi bele asesu ba programa reabilitasaun MEJD nian, maibé to’o agora seidauk iha rezultadu. Tanba ne’e uainhira tempu udan afeta maka’as ba prosesu aprendizajen iha eskola,” nia dehan.
Enkuantu Diretór Servisu Edukasaun Munisípiu Lautém, Rui Manuel, esklarese katak eskola Ensinu Báziku Filíal 30 de Agusto tama ona iha lista reabilitasaun iha tinan 2023.
“Espera katak eskola refere sei hetan rehabilitasaun iha tinan ida ne,e hodi garante kualidade edukasaun iha Timor-Leste,” Diretór ne’e salienta.
Entertantu eskola Ensinu Báziku Fílial 30 de Agusto iha sala-de-aula ne’en, sala biblioteka ida no edifísiu ba profesór sira ida.
Eskola refere iha profesór hamutuk 15 kompostu husi feto hitu no mane ualu no iha estudante husi klase 1 to’o klase 6 hamatuk na’in 456 kompustu husi feto 235 no mane hamutuk nain 221.
Jornalista : Camilio de Sousa
Editora: Nelia Borges
