iklan

OPINIAUN

Demokrasia presiza Toleránsia (Antes no depois Eleisaun ita nafatin Timores – Ita Ida de’it)

Demokrasia presiza Toleránsia (Antes no depois Eleisaun ita nafatin Timores – Ita Ida de’it)

Hakerek-na’in: Aniceto Soares dos Reis (Alumni-UNTL)
Email: jireis118@gmail.com
Telemovél: +670 7730378
Revizór: Miguel Gonçalves, Dosente Integrál (#DCS-FCS-UNTL)

INTRODUSAUN
Demokrasia sai ona ran ba Estadu independente ida-ne’e, tanba sidadaun hodi livremente ezere ninia direitu, bazeia ba norma ne’ebé eziste, hodi sidadaun hotu bele sente saida mak liberdade no ezerse ho responsabilidade.

Demokrásia “demos no kratos” katak poder ne’ebé mai husi povu katak, povu ezerse nia direitu direitu polítiku, hodi hili ninia reprezentante, liuhosi eleisaun, hodi ba ukun no tarefa prinsipál mak serbí de’it ba bem komum, hodi hewai kualker interesse ne’ebé mak la kontribui ba edifikasaun sosiedade no sistema ida ne’ebé livre, independente no transparante.

Pré-kondisaun ida ba ezersísiu direitu demokrátiku, mak toleránsia ba diferénsia iha sosiedade, hodi kompriende ema seluk nia direitu, la’ós defende de’it nia ita-nia direitu, hodi prejudika ema seluk nia direitu, tan dala-ruma, ema ida sempre defende demokrasia, hodi ezerse livremente ka exazaradamente ninia direitu, hodi ignora ema seluk nia direitu.

Períodu eleisaun, serve sai reflesaun tanba antes ba ukun iha buat lubuk ida mak aprezenta, se sente katak, di’ak duni, mantein ba, ladi’ak duni troka liuhusi votu ne’ebé mak fó liuhusi eleisaun surfrájiu, universál, livre no sekretu tuir lei-inan.

Ba makaer ukun, loloos tenke mós halo reflesaun, atu hatete saida mak halo ona, no saida mak aprezenta maibé la kumpre, no ida-ne’e sisi onestidade polítika, atu bele iha biban atu hadi’a, tanba karik la iha onestidade mak, povu “ukun nia na’in” ne’ebé mak fó ukun ba ‘ukun na’in” sei la fó tan biban, hodi fila ba ukun.

Esensia husi eleisaun ida mak halo mudansa, tanba ne’e, iha fim-mandatu husi ukun ida, antes hakat ba votasaun ema hotu sempre hein mudansa ne’ebé mosu, liu-liu ba mudansa kualidade moris sosiedade nian, tanba ne’e, só eleisaun mak povu–votante deside opsaun ida loos nian liuba ukun ho konsiénsia husi kada votante ida.

DEMOKRASIA HAKESI HO TOLERÁNSIA

Timor-Leste nasaun ida ne’ebé mak ezersísiu demokrasia konsideradu a’as iha tinan 2022 no husi nasaun 10 iha Sudeste Aziátiku, Timor-Leste okupa númeru ida, tuir mak Indonézia no Singapura no ikusliu mak Birmánia/Myanmar (Annur, 2023)[1].

Sai demokrátiku la’ós signifika sai militánsia ba partidu ne’ebé mak mai ho naran demokrátiku, tanba nasaun ida-ne’e, mai ho naran Estadu Direitu Demokrátiku  katak, ema hotu iha liberdade, maibé iha limite ne’ebé tenke obedese, hodi la prejudika ema seluk nia liberdade no reflete ba afirmasaun husi iha investidura Prezidente Republika Kay Rala Xanana Gusmão iha loron 20 fulan maiu tinan 2002 iha Tasi tolu, “A democracia persupõe liberdade e a liberdade faz jus aos direitos fundamentais do homem e dos povos.”

Katak, garante justisa no dignidade umana, ne’ebé mak tane-as igualdade iha protesaun, regularizasaun no aplikasaun lei, liberdade katak, proteje ema hotu ninia liberdade no soliedariedade umana mos tenke garantidu iha lei, tanba ne’e, tuir  Franz Magis- Susseno, iha etika politik katak, “Iha ezersísiu direitu iha valór rua ne’ebé tenke proteje mak uniaun no liberdade, tanba tane a’as valor umanidade, limites  ba moris sosiedade nian”.

Nune’e, demokrasia la’ós mosu tanba de’it eleisaun, maibé demokrásia sai parte integrante iha moris lor-loron nian, hodi halo sosiedade ida-ne’e sei dinámiku liu-tan“A democracia deveria ser vivida diariamente pelo povo, na resolução dos seus problemas, na implementação dos seus proprios programas e na revitaliação das suas proprias capacidades de pensar e agir” Xanana Gusmão ko’alia kona-ba harii iha Sydney iha loron 26 fulan marsu tinan 2003.

Estadu direitu demokrátiku bazeia ba prespetiva husi Franz Magnis- Susseno iha livru Etika Politik katak, “1. garante aplikasaun lei katak, desizaun hotu tenke bazeia ba lei 2. ezijénsia aplika hanesan katak, nasaun aplika lei ho objetiva no igualitária, 3. Lejitimidade demokrátiku katak, uzu poder tenke substansiál ho aseitasaun husi sidadaun, sempre iha sira (povu) nia kontrolu ne’ebé mak hakesi ho ezijénsia katak, poder Estadu tenke la’o bazeia ba limites no 4. Demanda intelektuál katak, sidadaun hotu espessa sira-nia sentimentu katak, nia responsabiliza ba ninia hakalok.”

Sé ema hotu assume espíritu tolerante no kuda iha sosiedade nia le’et, konsiensializa malu kona-ba essénsia husi toleránsia, mak kualker diferensia iha sosiedade simu, tanba konsiente katak, diversidade no diferénsia iha sosiedade, hanesan parte integrante iha iha sosiedade nia moris.

Husi alkansu ba liberdade no toleránsia ne’e, mak Prezidente Repúblika, José Ramos-Horta deklara iha okaziaun barak katak “Timor-Leste é um oasis (rai bolur ida iha àrea rai-fuik maran ne’ebeiha bee) de tranquilidade” (Notisia Tatoli, edisaun 25 fulan Setembru tinan 2022), ho fundamentu katak, tanba númeru kriminalidade menus, assaltu armada la iha, la iha konflitu étniku no relijioza.

Husi funu naruk ba libertasaun nasionál, Timor-oan konsiente importásia husi toleránsia no simu-malu, tanba husi funu maun-alin iha dékada 70, ultrapassa memoria moruk, maibé husi ajustamentu polítika luta, mosu unidade nasionál, hodi hamutuk luta bá ukun rasik an. “re-organiza, presiza mak kria CNRM, M ba T (Maubrere bá Timorenses) ne’e tamba prosesu ida, ema barak mak hakarak tama tan, dehan ami la’ós Maubere, tau Timorense mak halibur tan ema,” Rekorda Xanana Gusmão iha Kampaña iha Viqeuque (21/03) ne’ebé transmite ho diretu iha Kanál SMNews no TVE-T, relasiona ho konjutura polítika Unidade Nasionál.

Kultura nahe-biti bo’ot hodi hadame-malu, rekonsialiasaun iha antes no pós independénsia tatoli ba ema hotu katak, biar diverjénsia ho tempu naruk, tempu la’o no aprende, hodi hakotu diferensa ne’ebé akontese, hodi hanoin de’it ba interesse komum, tanba rekonsiliasaun permite atu materializa vizaun estratéjika sira kona-ba nasaun hanesan  “A reconciliação constitui um pré-requesito para a estabilidade nacional, e a estabilidade nacional constitui por sua vez, um pré-requesito para o desenvolvimento” – Xanana Gusmão nia diskursu iha Universidade Melbourne iha loron 7 fulan Abril tinan 2003.

Iha sosiedade ida demokrátiku, forsa polítika ida iha obrigasaun atu atu halo “Edukasaun polítika ka political socialization ka political ho objetivu atu forma sidadaun ne’ebé mak di’ak (Good Citizens), responsável no demokrátiku.[2] Husi edukasaun polítika, mak sei hamoris ema nia maturidade polítika, entendimentu ba situasaun, sosiál polítika, aleinde defende ideolojia forsa polítika ida, maibé tenke iha prinsípiu ne’ebé orienta ba sosiedade demokrátiku, toleránsia no armonia.

Espíritu tolerante ne’e entre Timoroan sira, rekonsiliasaun no nahe-biti bo’ot, reprezenta maturidade, hodi hala’o ezersísiu demokrásia ne’ebé konsta liberdade, limite no toleránsia, entre povu, hodi simu no homan realidade ida hamutuk.

Tanba iha konflitu mak la iha pás, la iha pás mak la iha kondisaun hodi hala’o dezenvolvimentu. Nune’e toleránsia pilar ida husi Fraternidade humana “… no destaka importánsia ba diálogu, kompriensaun, toleránsia, igualdade jéneru no liberdade relijiaun no seluk tan” Prezidente Parlamentu Nasionál, Aniceto Guterres (Ajénsia Tatoli edisaun 25 Marsu 2023), “….atu ita iha kultura komum ba toleránsia entre ema”  Prezidente Republika, Ramos-Horta (Ajénsia Tatoli 04 Fevereiru 2023) no “importante liu mak se tinan-tinan ita hala’o fraternidade humana sei sai di’ak liu tan, hodi hametin unidade no fraternidade”, Xanana Gusmão (Ajénsia Tatoli  edisaun 18 Agostu 2023), hodi ema hotu bele moris hamutuk – konvivénsia humana ne’ebé nakonu ho pás no armonia nia laran.

Husi forma konvivénsia ne’e, reflete mós deklarasaun Fraternidade Humana husi Parlamentu Nasionál aprova resolusaun ida iha tinan 2022, hodi adopta dokumentu kona-ba Fraternidade Humana, ba Pás Mundiál no moris hamutuk, (Ajénsia Tatoli edisaun 12/05/2022),  ne’ebé iha parte balun ko’alia kona-ba toleránsia “Ko’alia ba-malu, rona-malu, habelar lisan toleránsia nian, simu ema seluk no moris hamutuk ho ema seluk, bele halakon problema ekonomia sosiál, polítika no ambiental ne’ebé mak halo todan ema barak”[3]. Katak, toleránsia sai mos forma-meiu – via ba rezolusaun problema iha sosiedade nia leet, tan husi toleránsia hamosu konsensu no formulasaun ideia hodi  rezolve saida mak sai problema komum ba sosidedade.

ELEISAUN MAK TESTE BÁ DEMOKRASIA

Objetivu luta Timoroan nian, mak edifika Estadu, sosiedade ida livre – liberdade, independente no demokrátiku tuir saida mak hateten husi Prezidente Nicolau do Reis Lobato liuhusi mensajen radiofónika “Não suportamos mais os maus tratos  as injustisas, as humiliações, as violações das nossas mulheres, os complexos, um pais livre, onde todos se tratam como camaradas e onde a preocupação sumprema de todos seja a procura de maior felicidade para o povo”, katak final husi luta mak trava no hakotu tratamentu dezumanu, humilasaun, injustisa no vioalasaun no tanba ne’e, ema hotu, forsa polítika no entidade hotu, tenke assume ba realizasaun mehi ne’e, liu husi unika via mak ezersísiu ba liberdade no demokrasia.

Husi kedas artigu 1, aliñea 1 Lei-Inan KRDTL mak temi kedas fundamentu husi Estadu demokrátiku, “Repúblika Demokrátika Timor-Leste katak Estadu ne’ebé demokrátiku, sobrearanu, independente no unitáriu, harii hosi povu nia hakarak no iha respeitu ba dignidade ema moris ida-idak nian,” katak, povu nia hakarak (vontade populár) mak kria Estadu demorátiku ida-ne’e, nune’e edifikasaun ba ukun ida-ne’e, mai husi povu katak ukun husi povu, ba povu, atu serbí povu – demokrasia no atu hetan ukun ida ne’ebé mai husi povu mak liuhosi eleisaun no transporte ka meiu atu ba ukun mak liuhosi partidu polítiku no rezultadu husi vontande popular mak espressa liuhosi eleisaun, tuir provizaun KRDTL artigu 7, kona-ba objetivu Estadu.

Tanba saida mak eleisaun teste ida-ne’e hanesan tese ida ba ezersísiu demokrasia iha Timor-Leste?. Husi pozisaun dahuluk, inside demokrasia iha Sudeste Àziátiku, mak bainhira iha kontestasaun oi-oin ba prosesu eleitorál la ho fundamentu, kontesta rezultadu eleisaun ne’ebé hanesan poder popular, tendénsia instabilidade polítika, mak prejudika mós dezempeñu demokrasia ne’e rasik no possivelmente indise demokrasia iha Timor-Leste bele hakiduk ba kotuk, tanba ne’e importante tebes, atu sidadaun – ema hotu, forsa polítika, lider polítiku, ka entidade hotu, ezerse nia direitu ho responsabilidade, hodi garante katak, ezersísiu demokrátiku ne’e saudável.

Liberdade ne’e nia folin karun, Timoroan rihun atus rua resin mak sakrifika ninia vida, hodi edifika rai ida-ne’e, “o povo de Timor-leste está reconstruindo com o seu proprio sour, com o seu proprio sangue uma patria revolucionaria e democrática. Uma terra livre, para gente livre” – Mensajen Radiofóniku husi Premeiru-Ministru RDTL, Nicolau dos Reis Lobato iha 20 de Maio de 1978 no tanba ne’e, partidu polítiku no lider ne’ebé mak hamriik iha palku hodi haklaken projektu polítiku, presiza iha iha nosaun ida katak, lakon ka manán ne’ebé valór husi demokrásia katak, ida ne’ebé mak manán Timoroan hotu mak manán, tanba poder populár mak deside, hodi hakotu ka hanaruk ukun-na’in sira-nia mandatu husi ukun ida.

Normalmente, problema sempre mosu iha períodu pós eleisaun, ezemplu: akontesimentu iha Watulari iha 2007, área pretense ba Cristo Rei iha 2012 no fatin seluk, to’o insidente sira-ne’e, hamosu vítima mortál, estragu no situasaun ne’e akontese tanba partidu polítiku ne’ebé konkorre iha eleisaun la ezerse ninia knaar, nu’udar edukadór polítiku ba nia militansia sira, hodi la simu rezultadu husi vontade populár ne’e.

Se kompriende kontestu eleitorál mak hanoin katak, partidu polítiku sira, meramente transporte ba poder, ida ne’ebé lakon ka manán ne’e rezultadu ida husi prosesu demorátiku no ida ne’ebé mak ukun, mak ukun hotu ida ne’ebé lakon no ida ne’ebé derrota ka hanaran “governu Timor-Leste no Prezidente  RDTL”, signifika katak, partidu derrotadu ka vensedór, hotu-hotu manán, governasaun ida ne’ebé sei tau-matan ba nasaun.

Divizaun iha sosiedade la folin buat ida, tanba dezde kolonia nia tempu to’o ukun rasik an, luta komum ida mak liberta patria, kombate korrente poder estranjeira, kombate divizionizmu – divide et impera no Timor-Leste nafatin sai ida de’it ba Timoroan hotu, tanba mesak huun ida no abut ida, nafatin Timores – liafuan unifikasaun husi Nicolau Lobato ba povu Timor-Leste, “ De Oecusse a Tutuala, de Lospalos às fronteiras, de Atauro a Jaco, de Mar à Mar,  somos so um povo, uma so nação, com uma so patria: Timor-Leste”  mensajen radiofóniku husi Prezidente RDTL Nicolau Lobato  iha loron 20 fulan Maio 1978. Mensajen ne’e reprezenta unidade nasional ka apelu ba ema hotu, atu luta ba kauza ida mak ba libertasaun total.

Nune’e, Timoroan hotu, luta ba liberdade no konsege koletivamente, ohin loron, ezerse livremente ninia direitu polítiku hodi hili, ukun ne’ebé mak atu serbí povu, hasai povu husi pobreza estrema, subnutrisaun, marginalizasaun, hadi’a povu no nasaun nia moris no igualdade ba ema hotu “A liberdade que serve ao povo não é aquela que é apenas proclamada nas leis ou discurssos dirigidos às massas populares. A autêntica da liberdade é aquela que assenta na base da igualdade, de facto, das pessoas-  Nicolau Lobato, tanba konsiente katak, se la’ós Timoroan mak ukun-an-rasik ka ukun-rasik-an, mak poder estranjeira sei sama-metin no hanehan nafatin, “Malae sira hatudu hahalok ida ne’ebé halo povu Timor ne’e, sai fali atan, la trata povu hanesan ema, povu ne’e sira sela hanesan kuda para sa’e!. Lae! Ne’e tenke para kedas!” – mensajen revoltozu husi Xavier do Amaral iha livru Biografia no Historia Moris husi Francisco Xavier do Amaral, ne’ebé hakerek husi Aniceto Guru-Berteni Neves iha tinan 2020.

Ba alkansu ida-ne’e, mak rekre nafatin unidade nasional entre kamada jerasaun hotu, ba kauza komum ida mak bem-estar sidadaun nian “Mai ita harii esforsu ida, hamutuk hamosu rezultadu ruma akontese iha demokrasia – Mari Alkatiri iha Ajénsia Tatoli edisaun 20 de Maio de 2017”

VONTADE POPULÁR, DESIZAUN SUPREMA

Lider nasionál sira sempre rekoñese essensia husi vontade popular “Constamos com uma força inesgotável que contribui desizivamente para a luta, é o povo de Timor-Leste – Nicolau dos Reis Lobato” no “O Verdadeiro Heroi é o povo de Timor-Lorosa’e – Kay Rala Xanana Gusmão” katak, vontade popular ne’e mak suprema, tanba nia mak deside hakotu ka hanaruk husi ukun ida.

Husi vontade popular ne’e, mak lider bo’ot nasaun nian, nunka dehan, ha’u mak halo ida-ne’e no halo ida ne’ebá, tanba se mak atribui fiar no sé mak iha poder atu hakotu fiar, mak povu Timores (termu ne’ebé Prezidete Nicolau Lobato uza bá Timor oan sira, além de Maubere), liu husi dalan demokrátiku no bainhira promove dehan ha’u mak halo buat hotu, mak iha tendénsia atu hewai ida seluk ninia kontribuisaun no risku mak lakon konfiansa polítika.

Assenta iha demokrásia, partidu polítiku iha obrigasaun atu halo edukasaun polítika, konsiensializasaun polítika, hodi rekoñese ninia vitoria ka ninia derrota husi forsa polítika ida, tanba desizaun la’ós ida ne’ebé mak halkalak iha palku “Lider polítiku” maibé desizaun mak iha ne’ebé mak hamri’ik iha kabina de votus hodi deside “ voter” mak povu Timor-Leste.

Tanba ne’e, importante duni sai demokrátiku, hado’ok buat hotu ne’ebé sai amesa ba ezersísiu demorátiku ida ne’e, hanesan uza forma oi-oin atu atinji ukun “o fim justifika os meiu – Niccolo Machiaveli “la simu rezultadu eleisaun, la simu realidade katak nia tenke ba opozisaun ida ne’e tenke hado’ok, tanba tuir Franz Magnis Suseno“Wainhira demokrasia rahun, mak liberdade ida-ne’e mós konserteza sei la eziste no la iha demokrasia mak la iha ona respeitu ba dignidade humana.”

Nune’e, la iha ida mak lakon, tanba partidu derrotadu ka vensedór, ida ne’ebé forma governu ho baze konstituisaun RDTL artigu 106, iha obrigasaun atu serbí povu, ne’ebé sai militánsia ba partidu derrotadu ka vensedór, tanba partidu ne’ebé mak kaer ukun sei hanaran ukun ne’e mak governu Repúblika Demokrátika Timor-Leste – RDTL, hodi serbí igualitáriamente (la haree ba kor, rasa, étnika ka krensa)  povu Timor-Leste, hodi assegura katak, ema-hotu sente, sentidu husi ukun rasik an, no tuir Ferdinand Lasale iha livru Sosial Demokrasi katak “responsabilidade sosiál no ekonomia tenke aumenta gradualmente, nune’e bele harii ordem social ho baze ba soliedaridade” no prinsípiu ne’e reflete ba artigu 6 husi lei-inan, kona-ba objetivu Estadu nian.

Timoroan sira, harii rai ida-ne’e, ho vontade rasik ka vontade popular “Povu Timor-Leste harii ho nia kosar ben rasik, ho nia ran rasik, rai revolusionária ida no demokrátika. Rai livre ba ema livre – Prezidente Nicolau Lobato” no husi vontade popular ne’e mak povu ne’e mak heroi ba edifikasaun Estadu ida ne’e “O Veradeiro Heroi é o povo de Timor-Lorosa’e – Kay Rala Xanana Gusmão”. Nune’e iha loron votasaun, eleitór ida mak deside ho konsiénsia rasik, hodi ida ne’ebé mak ideal liu atu ukun.

Iha loron 30 fulan Agostu tinan 1999, bainhira hakat ba sentru votasaun, ho hanoin ida katak, pregu ne’ebé atu tu’u ba buletim votus ne’e, sei lori mudansa no iha termu indonéziu “Coplos untuk perubahan”, hodi hakotu torturasaun, intimidasan, massacre no abuzu ne’ebé komete husi poder estranjeira- Rejime Soeharto nia liman-ain sira no rezultadu hatudu duni mudansa, hodi materializa mehi naruk husi bei-alan sira, katak, harii rai livre ba Timoroan hotu.

Ho liberdade, Timoroan tenke hahú homan realidade husi auk-desan, tanba buat hotu ne’ebé mak harii durante tinan 24 nia laran, Indonéziu sira hamotuk hotu, antes husik hela rai Timor-Leste ida ne’e, sai hanesan Estadu independente ida.

Husi 2001, 2007, 2012, 2017, 2018 ka sirklu eleitorál ne’ebé mak Timoroan ultrapassa, sempre mai ho nosaun ida katak, votu ka ezersísiu direitu polítiku iha loron eleisaun, tenke rezulta mundansa, maske ne’e mudansa gradual, maibé pelu menus, sai hanesan baze ida, hodi lori sosiedade ida-ne’e ba prósperiedade.

Sé entende essénsia husi demokrásia mak, saida mak ema hotu hein iha eleisaun, mak governu-ezekutivu-makaer ukun ida ne’ebé mai ho vizaun ida, hanoin ida, asaun ida, atu harii inkluzivamente, sosiedade ida ne’ebé ema hotu, servisu hamutuk, tratamentu hanesan, liberdade no soliedariedade entre ema.

KONKLUZAUN

Liberdade hanesan pilar importante iha ezesísiu demokrasia, maibé iha kontestu ne’e iha mós direitu no dever, atu ema ida ne’ebé ezerse diretu labele assume ezageradamente hodi prejudika ema seluk nia liberade.

Sirklu eleitorál iha ámbitu eleisaun parlamentár ne’e parte ida husi demokrasia – demos no cratos katak, poder husi povu, ho povu ba povu, tanba ne’e, kada tinan lima, sidadaun hotu ne’ebé elejivel ezerse nia direitu tuir lei inan RDTL artigu 7 aliñea 1 katak, “povu hala’o nia kbi’it polítiku, liuhosi, surfrájiu universal, livre, direitu, sekretu no periodiku” no hodi hili Forsa polítika ida ne’ebé mak konsidera ideal no iha kapasidade atu lori nasaun ne’e ba oin.

Importante mós atu tane-as espíritu toleránsia, atu ema ida, grupu ida, forsa polítika ida ka ema lubun ida, demokrátikamente hala’o nia knaar, tanba ezersísiu demokrásia rekere toleránsia mutua entre kamada hotu iha sosiedade, hodi nune’e, kualkér rezultadu husi eleisaun ida-ne’e reprezenta vontade popular, katak povu mak deside.

Husi espíritu tolerante ne’e no entendimentu ba prosesu demokrásia, mak importante atu simu kualkér rezultadu, derrota ka vitoria ne’e rezultadu husi vontade popular no ida ne’ebé mak lakon konsiénsia katak katak ne’e demokrásia no ida manán hodi forma governu tuir konstituisaun RDTL artigu 106, hodi serbí inkluzivamente Timor oan hotu (ukun ida lakon no manán hotu).

Nune’e, importante atu partidu polítiku 17 ne’ebé konkorre iha eleisaun 21 maiu 2023 ne’e, simu rezultadu husi prosesu ida no admite katak, antes no depoiz, hotu-hotu nafatin Timor-oan (Timores – Prezidente Nicolau Lobato atribui ba Timoroan), la iha ida mak lakon ka manán, hotu-hotu ba haksolok iha kampaña polítika no halo julgamentu popular iha eleisaun no simu rezultadu husi eleisaun.

Referénsia:

Asembleia Konstituante, (2002). Konstituisaun Republika Demokrátika Timor-Leste, artigu 1, 6, 7 no 106

Annur, C. Mutia, (2023) Skor Indeks Demokrasi Liberal Negara-negara Asia Tenggara (2022), https://databoks.katadata.co.id/datapublish/2023/03/07/meski-bukan-terburuk-di-asean-indeks-demokrasi-liberal-indonesia-masih-di-bawah-timor-leste

Gusmão, M. (2018), Nicolau Lobato “Sabemos e podemos e devemos vençer”: Martinho G. da Silva Gusmão, PT Penerbit Dioma, Malang, Pag, 185, 207 no 223.

Guru-Berteni, A. (2020), Biografia no Istoria Moris Francisco Xavier do Amaral, Centro Nacional Chega, Pag. 47

Magnis, S., Frans, (1987), Etika politik, Prinsip Moral Dasar Kenegaraaan Moderen, Jakarta: PT Gramedia Pustaka Utama, Pag. 376 – 379, Pajina 109

Meye, T. (2003), Sosial–Demokrasi Dalam Teori dan Praktek, Yogyakarta: Center For Social-Democratic Studies (CSDS), Pag 33

Pasaribu, P., (2017). Peranan Partai Politik dalam Melaksanakan Pendidikan Politik. JPPUMA: Jurnal Ilmu Pemerintahan dan Sosial Politik, 5 (1): 51-59, https://scholar.google.com/scholar_url?url=https://ojs.uma.ac.id/index.php/jppuma/article/download/1125/1139&hl=en&sa=X&ei=ZXNfZLOfG72P6rQP78uq-A0&scisig=AGlGAw980As_jWqRlxKsXENguDZr&oi=scholar

Vaticano (2019). A FRATERNIDADE HUMANA EM PROL DA PAZ MUNDIAL E DA CONVIVÊNCIA COMUM, https://www.vatican.va/content/francesco/pt/travels/2019/outside/ documents/papa-francesco_20190204_documento-fratellanza-umana.html

Xanana, G. (2012), e o primeiros 10 anos da construção de estado timorenses, Porto Editora, Pajina 31, 56 no 63.

 

[1] https://databoks.katadata.co.id/datapublish/2023/03/07/meski-bukan-terburuk-di-asean-indeks-demokrasi-liberal-indonesia-masih-di-bawah-timor-leste

[2] https://scholar.google.com/scholar_url?url=https://ojs.uma.ac.id/index.php/jppuma/article/download/1125/1139&hl=en&sa=X&ei=ZXNfZLOfG72P6rQP78uq-A0&scisig=AGlGAw980As_jWqRlxKsXENguDZr&oi=scholarr

[3] https://www.vatican.va/content/francesco/pt/travels/2019/outside/documents/papa-francesco_20190204_documento-fratellanza-umana.html

 

iklan
iklan

Leave a Reply

iklan
error: Content is protected !!