MALIANA, 20 maiu 2023 (TATOLI)-Unidade Patrullamentu Fronteira (UPF) forma ona ekipa movel ne’ebé pertense ba Kompañia ALFA, CARLY no BRAVO, atu intensifika serbisu hodi halo vijilánsia iha liña fronteira, liuliu área sira-ne’ebé konsideradu risku ba movimentasaun ilegál sidadaun Timor-Leste no sidadaun Indonézia nian.
Komandante UPF interinu, Asistente Superintendente Carlos Maia, konfirma planu operasaun no ajusta mós ho planu hosi Komandu Jerál Polísia Nasionál Timor-Leste (PNTL) hodi koloka membru sira halo vijilánsia iha postu hotu-hotu inklui apoia seguransa ba sentru votasaun no estasaun votasaun.
Membru hirak-ne’e koloka iha munisípiu Bobonaro, Covalima no Rejiaun Administrativa Espesiál Oe-Cuse Ambeno (RAEOA) durante prosesu eleisaun to’o remata.
Notisia Relevante: UPF detein timor-oan ida lori osan rupiah hosi Bobonaro mai Dili
“Ita mós forma ona ekipa movel iha área hirak-ne’ebé maka tuir informasaun risku ba ita-nia sidadaun tama mai hodi partisipa iha eleisaun,” nia ko’alia iha edifísiu STAE, munisípiu Bobonaro, sábadu ne’e.
Komandante ne’e afirma, iha operasaun ne’e sei halo pasa-revista ba kualkér sidadaun liuliu sidadaun Indonézia ne’ebé movimenta iha liña fronteira tuir dalan ilegál.
“Ita husu loloos ne’e nia pertense ba sidadaun ida-ne’ebé, tanba tuir lei iha país Indonézia la aplika dois sidadania, so Timor-Leste de’it, ita identifika katak sidadaun balu deklara katak sidadaun Indonézia, klaru ita sei servisu hamutuk ho migrasaun, ita deporta fali sidadaun refere ba nia país orijen, maibé kuandu sidadaun nasionál ne’ebé mak karik durante ne’e hela iha Indonézia, hakarak tama mai ita tenke autoriza,” nia dehan.
Asistente Superintendente ne’e subliña, planu operasaun ne’e implementa dezde loron (10/05) to’o eleisaun remata liuhosi sirkular alerta um ba membru hotu-hotu sei la goza sira-nia direitu iha loron feriadu.
Komandante ne’e apela ba komunidade hotu-hotu ne’ebé hela besik iha liña fronteira atu koopera ho ekipa UFP hodi bele asegura liña fronteira sai fatin hakmatek ba ema hotu.
“Karik sidadaun estranjeiru ne’ebé tama hosi parte sorin atu mai partisipa eleisaun, tenke informa ba parte seguransa liuliu UPF atubele evita hodi bele foti asaun,” nia apela.
Notísia relevante: PNTL Bobonaro sei apoia UPF kontrola fronteira iha loron eleisaun
Jornalista: Sérgio da Cruz
Editór: Evaristo Soares Martins
