iklan

DILI, ELEISAUN

STAE halo fallansu boot iha prosesu kontajen votu Elpar 2023

STAE halo fallansu boot iha prosesu kontajen votu Elpar 2023

Prezidente Repúblika (PR), José Ramos Horta. Imajen Tatoli/António Daciparu.

DILI, 22 maiu 2023 (TATOLI)–Prezidente Repúblika, José Ramos Horta, hateten Sekretáriu Tékniku Administrasaun Eleitorál (STAE) halo fallansu boot iha  prosesu kontajen votu nasionál ba eleisaun parlamentár 2023.

“Signifika fallansu boot iha STAE ne’e, STAE mak bele esplika la’ós internet ka Timor Telecom atu aumenta kapasidade. STAE tenke tau ema ne’ebé iha esperiénsia, agora iha STAE hasai tiha ema ne’ebé iha esperiénsia tau fali ema politika sira, nune’e lahatene atu halo saida iha ne’ebá. Lahalo atualizasaun, halo manutensaun ba ekipamentu sira. Presiza tau ema ne’ebé iha formasaun di’ak, ema tékniku nian nune’e bele di’ak,” PR Horta hateten ba jornalista sira, hafoin hala’o vizita no hasoru malu ho Prezidente Komisaun Nasionál Eleisaun (CNE) iha Colmera, segunda ne’e.

Xefe Estadu haktuir, ho fallansu ne’e mak observadór sira inklui jornalista sira balun labele asesu kontajen votu nasionak eleisaun parlamentár 2023.

“Ha’u mai hasoru Prezidente CNE tanba iha preokupasaun barak hosi korpu diplomátiku, jornalista, observadór sira, nune’e kontaktu ha’u husu informasaun no esklarasaun ruma tanbasá mak laiha informasaun ruma transparante, mak kontajen ne’e mídia tomak tenke asesu. Maibé labele asesu,” Xefe Estadu hateten.

Ho kestaun ne’e, Prezidente Repúblika sei husu sé mak halo auditória tanba ema labele asesu.

“Ne’eduni, ha’u sei husu auditória no sé mak sei halo auditória ne’e, tanba ema hotu-hotu hein hela tantu rai-li’ur komesa horikalan no komunikasaun sai la para. Povu tranquilo depois haree televizaun sira,” nia dehan.

Ramos Horta hateten, ida-ne’e preokupasaun no halo foer Timor nia naran, afinál uza demokrasia ba eleisaun di’ak loos maibé agora Timor nia naran sei tuun makaas, hafoer naran, hamonu kredibilidade.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!