OÉ-CUSSE, 31 maiu 2023 (TATOLI) – Diresaun Rejionál Infraestrutura (DRI), Rejiaun Administrativa Espesiál Oé-Cusse Ambeno (RAEOA) ameasa sei hakotu kontratu ho kompañia Zero Quatro Lifau Unipesoál Lda, tanba ezekuta projetu sala Unidade Kuidadu Intensivu (ICU) iha Hospitál Referál Oé-Cusse liu ona kontratu.
Diretór DRI Oé-Cusse, Candido dos Reis Amaral, informa, tuir loloos kompañia entrega projetu ICU ne’e iha 11 abríl 2023 ne’e, tanba durasaun kontratu durante fulan-haat de’it, hahú iha dezembru 2022 to’o abríl 2023, maibé projetu ne’e rasik nia progresu fíziku foin atinje 30%.
“Projetu ICU ne’e atraza, ohin ami hamutuk ho Sekretáriu Saúde no Administradora Hospitál Referál ami enkontru, no bolu kompañia mai ona fó klarifikasaun, nia hato’o ona difikuldade lubuk, aprezenta mai ita, Ohin nia halo ona deklarasaun ofisialmente, ha’u husu ba nia atu hato’o klarifikasaun eskrita, iha semana rua tanba ohin nia halo ona kompromisu ho Autoridade liuhosi Sekretáriu Saúde, sei semana rua laiha karta eskrita ita sei hapara nia,” Candido Amaral, informa ba jornalista sira iha Oé-Cusse, kuarta ne’e.
Notísia relevante: RAEOA aloka millaun $1-resin konstrui fasilidade saúde públika
Tuir Diretor ne’e katak, razaun projetu ICU atraza tanba, dahuluk iha mudansa ba dezeñu, la’ós mobilizasaun materiál mai hosi rai-li’ur, maibé Autoridade fó tempu semana rua atu hato’o razaun ho eskrita kona-bá difikuldade ne’ebé kompaña enfrenta iha tempu ezekusaun.
Direitór Obra Públika ne’e konfirma, progresu fíziku ne’e la’o atraza maske liu ona termu kontratu, tanba fallansu iha jestaun no finanseira, nune’e husu kompañia presiza hadi’a mekanizmu jestaun finanseira atu labele afeta ba projetu ne’e rasik.
“Tanba nia progresu fíziku, agora foin mak 30%, entaun presiza hadi’a jestaun, tanba iha fatór importante rua maka sei iha, primeiru finanseira no jestaun ne’ebé di’ak, maibé jestaun di’ak maibé finanseira fraku, ne’e afeta ba projetu ne’e rasik, entaun ami husu ba sira atu hadi’a kondisaun ne’e hanesan, nune’e serbisu bele konklui ho lais,” nia fó hanoin.
Nia hatutan, ida-ne’e parte ida Autoridade extende nia mandatu, bazea pedidu kompañia nian atu aumenta tempu kontratu, no kompañia promete iha komitmentu hakarak finaliza obra ne’e nia tempu badak.
“Entaun ida-ne’e ita-bele konsidera no respeita ba ida-ne’e, importante kompañia iha komitmentu atu konklui projetu ne’e,” nia katak
Entretantu, konstrusaun sala Unidade Kuidade Intensivu ne’e kompañia Zero Quatro Lifau Lda, ezekuta ho valór kontratu hamutuk $219,075.50, orsamentu ne’e Autoridade RAEOA aloka hosi Orsamentu Jerál Estadu (OJE) 2022 nian.
Durasaun projetu ne’e durante fulan haat, kompañia Zero Quatro Lifau Lda hahú hatuur fatuk dahuluk iha loron 10 dezembru 2022 tenke remata iha loron 11 abríl 2023.
Notísia relevante: Inaugura projetu saúde tolu iha Oé-Cusse, Taur husu profisionál atende povu ho di’ak
Jornalista: Abílio Elo Nini
Editor: Evaristo Soares Martins
