SEJD promove atividade jinástika iha Bobonaro
MALIANA, 31 maiu 2023 (TATOLI) – Sekretaria Estadu Juventude no Desportu (SEJD), hala’o atividade jinástika hodi promove ba funsionáriu públiku no estudante hosi Ensinu Báziku no Ensinu Sekundáriu Jerál sira iha munisípiu Bobonaro atu hamoris fali atividade fízika kada semana.
Sekretáriu Ezekutivu Komisaun Nasionál Desportu hosi SEJD, João Rodrigues, esplika atividade jinástika ne’e atu promove ema hotu, liuliu estudante sira bele iha aptidaun fízika no moris ho saudável.
Atividade fízika ne’e mós parte ida atu halo prevensaun ba moras, tanba daudaun moras barak mak afeta joven sira to’o baixa iha ospitál.
Notísia relevante: SEJD tau mós prioridade ba jinástika iha eskola hotu
“Situasaun iha Timor ita-nia atividade fízika ne’e hosi países 146, ita iha 142. Signifika atividade fízika menus loos iha Timor, tanba ne’e SEDJ motiva halo atividade la’ós de’it jogu voleiból, basketeból no futeból, maibé iha mós jinástika ho labarik sira, atu hahú daudaun halo movimentu tanba jinastika importante ba sira-nia saúde,” nia informa ba jornalista sira, iha Jináziu Maliana, kuarta ne’e.
Nia subliña, atividade ne’e hala’o durante loron-lima, hahú iha loron-segunda ne’e no sei ensera iha loron-sesta semana ne’e.
“Ami espera katak sesta sira bele halo ona performa, bele aprezenta daudaun ho labarik estudante ensinu báziku, sekundáriu sira bele daudaun ona sesta-sesta halo ona iha eskola, no mós funsionáriu iha funsaun públika, tanba iha ona orientasaun hosi governu katak kada sesta lokraik tenke halo halo atividade fízika, jinástika,” nia katak.
Atividade ne’e tuir planu sei hala’o mós iha munisípiu Ermera, Baucau no munisípiu Lautem. Enkauntu atividade ne’e realiza kada tinan iha munisípiu haat tuir kapasidade orsamentu ne’ebé iha.
Porfesór Ensinu Báziku Sentrál Raifun, Saturnino Madeira, sente kontente no agardese bele hetan oportunidade partisipa iha ezersísiu ne’e, tanba liuhosi jinástika bele hadook-aan hosi moras.
Enkuantu atividade ne’e realiza kada tinan iha munisípiu haat, maibé tinan ne’e realiza iha munisípiu Bobonaro, Ermera, Baucau no munisípiu Lautem.
Notísia relevante: Prevene moras la hada’et, OMS entrega ekipamentu jinástika ba MS
Jornalista : Sergio da Cruz
Editór : Evaristo Soares Martins
