Governu foun presiza fó prioridade konstrusaun SSS iha munisípiu haat
DILI, 06 juñu 2023 (TATOLI)—Diretór Nasionál Orsamentu Jestaun Finansa no Patrimoniál MSSI, Jimmy Valente de Orlean dos Reis, hateten, Governu foun mai presiza fó prioridade konstrusaun ba Sentru Solidariedade Sosiál (SSS) iha munisípiu Aileu, Ainaro, Liquiça no Viqueque.
“Kuandu ita ko’alia kona-ba nesesidade mak ita presiza tau prioridade ba desentralizasaun nian mak konstrusaun edifísiu sentru solidariedade sosiál iha munisípiu haat importante liu. Tanba servisu sira atu la’o di’ak ne’e, tenke aselera konstrusaun nune’e tinan ne’e bele finaliza ona,” nia dehan ba Agência Tatoli, iha nia kna’ar fatin Caicoli Dili.
Tanba, tuir nia, obra ne’e hahú kedas tinan kotuk maibé to’o agora seidauk finaliza, nune’e husu ba Governu foun ne’ebé sei mai, tenke fó prioridade ba konstrusaun edifísiu sentru solidariedade sosiál sira-ne’e.
“Ita loloos ne’e finaliza ona maibé tanba impaktu hosi udan hodi labele asesu dalan no mós impaktu hosi inflasaun hodi presu sasán konstrusaun sa’e makaas, entaun empreza labele kontinua maibé fiar katak tinan ne’e bele finaliza. Espera ida-ne’e sai prioridade ba Governu foun mai,” nia dehan.
Prioridade tuir mai mak programa bolsa da mãe jerasaun foun nian, tanba programa ne’e bele akomoda ona nesesidade inan isin-rua no labarik, tanba ne’e presiza kontinua nune’e bele redúss raes badak no saudavél.
“Programa ne’e fó ona benefísiu ba benefisiáriu liu 43.000 iha munisípiu hitu no ida-ne’e sei alarga tan ba munisípiu seluk maibé Governu foun mai tenke tau prioridade mós,” Jimy dehan.
Diretór ne’e hateten, prioridade seluk mak daudaun ne’e MSSI prepara hela lei bem-estar sosiál ne’ebé ho hanoin katak programa hotu-hotu tenke bazeia ba lei ne’ebé iha.
“Ida-ne’e ita bele bolu hanesan lei baze ba Ministériu atu hala’o tuir nia programa. Se Governu foun mai kontinua no finaliza mak futuru implementa programa sei di’ak liután. Lei ida-ne’e iha nia benefísiu tanba liuhosi lei ne’e mak ministériu tau prioridade hodi implementa programa,” nia dehan.
Nia hateten, atu kompleta lei bem-estar sosiál ne’e mak MSSI lansa ona dadus ema vulneravél, no husu Governu foun mai atu haree no avalia mós programa hirak-ne’ebé iha ona dirasaun MSSI nian.
“Ita husu atu halo mós revizaun ba programa ministériu nian iha kada dirasaun, maibé karik programa ladi’ak maibé di’akliu husu atu kontinua mellora tanba programa hotu-hotu iha nia benefísiu ba benefisiáriu sira,” bia hateten.
Atu mellora no programa ne’e ho di’ak, nia dehan, mantein ho saida mak ministériu iha maibé kuandu halo mudansa mak defisil atu adapta ho buat foun ne’ebé Governu mai atu implementa.
Jornalista : Osória Marques
Editór : Cancio Ximenes
