MOP presiza koordena ho EDTL molok hahú projetu estrada Maliana
MALIANA, 06 junu 2023 (TATOLI)-Ministériu Obra Públika (MOP) presiza halo liña koordenasaun ho Eletrisidade Timor-Leste, Empreza Públika (EDTL,E.P) molok hahú implementa projetu reabilitasaun estrada Urbana Maliana pakote II ho modelu pista rua.
Koordenadór EDTL,E.P munisípiu Bobonaro, Mario de Jesus, hateten instituisaun rua ne’e presiza koordena malu, tanba bazea ba dezeñu no distánsia hosi obra ne’e iha poste eletrisidade barak mak afetadu hosi projetu refere.
Notísia Relevante:MOP presiza rezolve komunidade afetadu projetu estrada Maliana
“Ita komesa hosi Soso sae mai, ami-nia ai-rin sira-ne’e kona hotu, maibé to’o agora sira seidauk halo koordenasaun ho EDTL oinsá atubele halo mudansa liña sira-ne’e, ita la’ós impede dezenvolvimentu, maibé importante liu mak liña koordenasaun. Sé laiha derrepente mai sobu de’it, ida-ne’e mós ladún di’ak,” Nia informa ba Tatoli, iha Maliana, tersa ne’e.
EDTL hanesan empreza estatál sempre prontu apoia ba dezenvolvimentu, maibé molok hahú obra ruma presiza koordena no kolabora malu, atu nune’e iha implementasaun projetu labele atraza.
Tuir nia, presiza duni haree asuntu ne’e tanba bainhira empreza konstrutora hahú sobu estrada tuan, entaun EDTL,E.P mós sei gasta tempu muda poste no fasilidade sira seluk ne’ebé mak afetadu.
“Ami EDTL laiha difikuldade atu muda poste hirak-ne’e, maibé ami hanesan empreza buka rasik osan, katak muda ona poste hirak-ne’e asesoris balu maka ita labele uza ona, tanba kleur hotu ona, bainhira ita muda ona, ita tenke tau foun fila fali,” Mario katak.
Jerente EDTL,E.P munisípiu Bobonaro ne’e salienta, fulan kotuk ne’e tékniku sira konklui ona levantamentu dadus, tanba planu sei troka hotu poste tuan sira monta fali poste Congcreat ka ai-rin sumenti hahú hosi diresaun Nunura sa’e ba to’o Lahomea no hosi diresaun edifísiu administrasaun munisípiu Bobonaro ba to’o Ramaskora.
Projetu reabilitasaun estrada urbana Maliana Vila ho distánsia naruk kilómetru 4,91 no luan metru 23 ne’e lansa ona hosi Prezidente Parlamentu Nasionál, Deputadu Aniceto Longuinhos Guterres Lopes,viha sesta (01/06).
Enkuantu obra ne’e responsabiliza hosi Empreza Konstrutóra PT Hutama Karya (Parsero) ho valór projetu milaun $21,228,762.00 ho durasaun kontratu fulan 18.
Notísia relevante: Governu hatuur fatuk dahuluk ba projetu estrada urbana Maliana
Jornalista: Sérgio da Cruz
Editór: Evaristo Soares Martins
