Presu gazolina dalan-ninin iha Maliana, akua boot sa’e ba $7
MALIANA, 09 juñu 2023 (TATOLI)-Relasiona ho estoke kombustível mamuk iha Dili, negosiante kiik sira iha kapitál Maliana, munisípiu Bobonaro, hahú iha kinta (08/05) ne’e fa’an gazolina akua boot ida ho presu hosi $2 sa’e ba $7 to’o $8.
Justino Mali nu’udar negosiante, informa, sira deside hasa’e presu gazolina tanba hola tutan fali hosi ema seluk.
Notísia relevante: Postu abastesimentu kombustível la simu ona komunidade lori masa enxe gazolina
“Agora ami fa’an $7, mina hosi perbatasan mai ne’e mk ami ba hadau malu de’it, tanba agora mina tama hosi Dili laiha,” nia informa ba Agência Tatoli, iha merkadu Maliana, sesta ne’e.
Nune’e mós Edmundo Cavaleira, hasa’e presu tanba estoke tuan hotu ona dezde loron-kinta ne’e.
“Ita nia mina laiha ona, agora hola fali ema sira fa’an ki’ik ne’e ha’u hola $4,50 mai fa’an fali $5. Ne’e mós laiha ona tanba ha’u mós hola iha ákua de’it la’ós masa jerigen ida, agora hotu ona, sira balu tún ba kraik ne’e fa’an akua ida to’o $8,” Edmundo haktuir.
Diretór Kompañia Gracia Silvia, Francisco Seixas da Silva, konfirma dezde kuarta ne’e kedas sentru abastesimentu kumbustível ne’e la fa’an gazolina tanba estoke out iha nasionál.
“Ami-nia estoke mina ne’e bazea ba ETO no Pantai Kelapa, sé sira mak laiha ona ami labele halo buat ida, ami simu informasaun hosi ETO dehan tangal 12 agora, ne’ebé tangal 12 ne’e sira fa’an de’it ona ka foin atu tama mai hosi ró ne’e mak seidauk hatene. Hosi fali Pantai Kelapa nia dehan ohin tanggal 09, maibé agora ami seidauk rona rezultadu,” nia katak.
Nia observa dezde estoke out ne’e kedas presu gazolina sei normál ka seidauk iha mudansa.
“Sé presu foun atu iha mós, só tangal 09 ohin no tanggal 12 ne’e, mai mak presu sa’e ami mós sa’e tuir, agora sira halo daudaun iha Maliana laran ne’e, hanesan horisehik balun fa’an akua ida $4 la $5. Ida-ne’e mungkin pedagang kaki lima sira-nia, ho tempu ida-ne’e, sira hakarak hetan osan ka oinsá ne’e fila-fali ba sira,” nia hateten.
Entretantu motorista Ojek, Paulino Teti-Mau, sente triste tanba problema ne’e fó impaktu maka’as ba sira-nia rendimentu.
“Ami ojek ne’e loron ida movimentu ba mai sente araska loos, ami labele hetan to’o $5, se ami hetan $5 ne’e ba mina água ida nian de’it. Ne’ebé ami rekomenda ba governu foun rezolve lalais problema ida mina nian ne’e, tanba nesesidade bázika ida mós, sé ita la rezolve entaun nasaun ne’e ita atu lori ba ne’ebé,” nia husu.
Tuir observasaun Agência Tatoli iha terrenu katak, negosiante kiik sira-ne’ebé fa’an mina ida dala-ninin hahú hosi diresaun SoSo sa’e mak merkadu Maliana to’o Lahomea no bairru-bairru sira mós taka hotu.
Nune’e mós sirkulasaun transporte públiku iha kapitál Maliana no ba postu administrativu sira mós menus kompara ho antes ne’e.
Notisia relevante: ANPM konfirma semana oin estoke kombustível bele normál fali
Jornalista: Sérgio da Cruz
Editór: Evaristo Soares Martins
