SEII deskobre kazu insestu 200 iha territórriu nasionál
DILI, 09 junu 2023 (TATOLI)—Sekretária Estadu Igualdade ba Inkkuzaun (SEII), Maria do Rosário de Fátima Correira, hateten SEII deskobre kazu insestu iha territóriu nasionál hamutuk 200.
“Kazu insestu ne’ebé ami deskobre hahú hosi 2018 to’o 2023 hamutuk 200 ne’ebé ita foti ne’e simu uma mahon sira. No, ita haree katak vítima barak mak lahetan informasaun, entaun ida-ne’e baibain tiha maibé ami nafatin halo sensibilizasaun ba komunidade. Nune’e, ita-nia komunidade hatene, bainhira hetan kazu nune’e tenke hato’o keixa ba parte kompetente,” Maria do Rosário de Fátima hateten ba Agência Tatoli hafoin halo konferénsia imprensa kona-ba CEDAW, iha salaun Maria Gorrete, Dili, sesta ne’e.
Nia hateten, vítima iha uma mahon balun rekupera ona maibé difikuldade ida mak labarik sira labele asesu ba dokumentu, tanba iha igreja mós fó biban ba kazu insestu atu tau hotu iha dokumentu sira hanesan sertidaun batizmu no sertidaun RDTL.
“Ha’u dehan labele no ha’u halo aproximansaun, bainhira ha’u simu mandatu ida-ne’e hodi ba vizita uma mahon Salele no labarik barak mak laiha dokumentu legál,” nia dehan,
Atu hetan dokumentu legál, nia dehan, labarik iha uma mahon Salele husu oinsá nia prosesu no dehan ba igreja maibé igreja labele no igreja hakarak tenke tau aman biolojia nia naran loloos.
“Entaun, hosi ne’e ha’u ko’alia ho kardeal nune’e deside tau “incógnitos” iha labarik sira-nia sertidaun no ida-ne’e ita espera katak konferénsia episkopál nian ne’e bele tau karta pastorál ba munisípiu, postu hotu nune’e labarik hosi kazu insestu tau incógnitos,” nia hateten.
Ho kazu ne’e, nia dehan, presiza tau polítika no ezijénsia hosi Konvensaun kona-ba Eliminasaun ba ita-nia Forma Diskriminasaun oioin hasoru feto (CEDAW) nune’e bele aborda asuntu hotu-hotu tau iha asuntu jéneru nian.
“Ita-nia uma mahon sira iha Timor-Leste seguru atu asegura vítima kazu insestu sira. Hanesan uma mahon balun ema labele asesu, inklui imi jornalista sira tanba uma mahon mós iha nia mekanizmu,” nia hateten.
Jornalista : Osória Marques
Editór : Cancio Ximenes
