SEII preokupa kuota feto iha PN menus ba 30%
DILI, 09 junu 2023 (TATOLI)—Sekretária Estadu Igualdade ba Inkkuzaun (SEII), Maria do Rosário de Fátima Correira, hateten SEII preokupa ho kuota feto tuur iha Parlamentu Nasionál (PN) menus hosi 30%.
“Ita haree tinan ida-ne’e sinku lejislaruta iha Parlamentu Nasionál, ne’ebé agora daudaun ita atinje 40%. Maibé iha tinan 2023-2028, ita tun 10% no hela de’it 30%. Agora daudaun feto tuur hanesan deputada iha Parlamentu Nasionál mak hosi Partidu Kmanek Haburas Unidade Nasionál Timor Oan (KHUNTO) na’in-rua, PLP na’in-rua, Partidu Demokrátiku na’in-rua, CNRT na’in-10 no Partidu FRETILIN iha na’in-lima,” Sekretária Estadu Igualdade ba Inkkuzaun (SEII) ne’e hateten ba Agência Tatoli, hafoin halo konferénsia imprensa kona-ba CEDAW, iha salaun Maria Gorrete, Dili, sesta ne’e.
Entaun, hosi kandidatura na’in-65 iha PN, nia dehan hela deputada na’in-20 de’it ona.
“Ita haree katak kompozisaun ida-ne’e menus, entaun ita hotu tau forsa hamutuk hodi halo took rekomendasuan ba iha parte ezekutivu nian liu-liu partidu CNRT ne’ebé ho votu maiória no hamutuk ho PD atu forma Governu. Ita espera katak konsidera mós kuota ba feto sira,” nia rekomenda.
Nia hateten, bainhira konsidera feto ba kuota sira mak tenke tau iha área estratéjiku sira labele ba iha sosiál de’it.
“Nune’e, SEII rekomenda ba diretora ezekutiva rede feto atu hala’o lalais advokásia ba iha ita-nia partidu rua ne’e atu konsidera mós kuota ba feto nian. Tanba, tempu seidauk tarde no daudaun ne’e parte rua sei halo konsultasaun. Tanba, agora kona-ba ezekutivu uluk iha 25 maibé tun ba 15. Tanba ne’e, presiza halo advokásia ba parte rua ne’e,” nia dehan.
Nia dehan, presiza parte hotu nia esforsu no kolaborasaun atu bele tau importánsia mós ba feto tanba uluk dehan fó espasu bafeto iha fatin 3, 6, 9, 12, 15 ba feto maibé realidade la nune’e no tun tebes.
“Ita seidauk tarde no ami SEII rasik prepara karta ba Prezidente partisu CNRT no Partidu PD, ha’u mensajen verbalmente maibé seidauk resposta. Maibé, ami sei haruka karta ida ba sira, nune’e bele konsidera mós, feto iha ezekutivu nian,” nia dehan.
Jornalista : Osória Marques
Editór : Cancio Ximenes
