MSSI apoia FOKUPERS rihun $131 kada tinan
DILI, 12 juñu 2023 (TATOLI)—Koordenadora Crece Knua ba Labarik, Mercia Lopes, hateten, Organizasuan Fokupers mós hetan apoiu hosi Ministériu Solidariedade Sosiál no Inkkuzaun (MSSI) kada tinan hetan rihun $131 hodi halo atividade iha uma mahon tolu iha munisípiu Covalima, Dili, no Bobonaro.
“Kada tinan ita hetan $85.000 ba uma mahon Suai ho Dili, no uma mahon Maliana hetan osan $46.000,” nia dehan ba Agência Tatoli, iha nia kna’ar fatin Palpaso, Dili, segunda ne’e.
Hosi osan ne’e, nia esplika, hodi halo atividade estraordinária ba labarik sira, formasaun ba ema boot sira-ne’ebé iha uma mahon tolu ne’e, depois halo akonselamentu ba vítima sira, prepara ai-han mak sosa hahan ba sira, prepara fatin toba nian no seluk tan.
Diretór Nasionál Orsamentu Jestaun Finansa no Patrimoniál MSSI, Jimmy Valente de Orlean dos Reis, dehan apoiu ba Institutu Solidariedade Sosiál (ISS) mós la’o hela no nia akokasaun osan miliaun $1.4 ba instituisaun 28.
Hosi osan ne’e, seidauk aloka ba organizasaun sira tanba sira sei dezeña akordu nune’e entrega ba MSSI nune’e bele transfere osan.
“Ha’u hanoin dentru semana ne’e sira hatama ona akordu, nune’e ita haruka ona osan tanba liu fulan neen ona. Tanba, baibain neen fulan neen tenke haruka ona osan maibé ba tinan ne’e seidauk tanba sira seidauk hatama dezena akordu,” nia dehan.
Nia dehan, atividade non fíziku ne’e mak halo ezekusaun orsamentu MSSI sa’e makaas maibé ba atividade fíziku ladún tanba depende ba tempu no iklima.
Jornalista : Osória Marques
Editór : Cancio Ximenes
