DILI, 13 juñu 2023 (TATOLI)—Diretór Departamentu Saneamentu Dili, Herminio Moniz Ribeiro, dehan, osan ba ateru kontroladu iha Tibar munisípiu Liquiça hamutuk $17.900 ba durasaun tinan-10 nian.
“Osan ba ateru kontroladu nian hamutuk $17.900 ho durasaun tinan 10. Ekipamentu kolesaun ne’e nia durasaun to’o tinan hitu (7) ho nia osan hamutuk $7.600,” nia dehan ba Agência Tatoli, iha nia kna’ar fatin Matadouro, tersa ne’e.
Tanba, tuir nia, hafoin halo lansamentu iha dulan-marsu 2023 ne’e kompañia hahú hamoos slep kontentór nian ka kontentor nia fatin hodi tau kontentór.
“Depois lansamentu ba ateru kontroladu iha fulan-marsu, agora ita hamoos no halo ona kontentór nia fatin, hodi tau kontentór. To’o agora ita halo ona nia fatin iha Dili laran no iha ne’ebé-ne’ebé mak ita halo ona nia fatin ne’e liu ona-10. Sira-ne’ebé ita hamoos ona atu tau slep bele dehan 40 ona. Atividade ida-ne’e iha Dili la’o hela no mós iha Tibar,” nia dehan.
Nia hateten, hein ekipamentu no bainhira to’o koloka de’it ona maibé kona-ba instalasaun ekipamentu tuir kalendáriu no karik laiha amandamen ruma mak ekipamentu sei to’o mai iha juñu nia rohan.
“Tanba, ita asina ona kontratu no pagamentu adiantamentu mós halo tiha ona. Nune’e bainhira to’o mai ita koloka ba nia fatin. Kontentór ne’e ho nia kubikumetru ualu no iha balun 21,” nia hateten.
Nia dehan, projetu iha Governu atuál nian maibé bainhira governasaun foun mai sei kontinua de’it tanba asina ona kontratu ho kompañia.
“Mezmu iha governasaun foun, ita la’o nafatin. Hein katak, Governu foun bele halo kontinuasaun ba projetu ne’e,” nia dehan.
Implementasaun ateru kontroladu ne’e estratejia ida ho Governu atuál, hodi redús lixu iha kapitál Dili.
“Agora ita hein bainhira ekipamentu to’o mai Timor-Leste, nune’e mak ita halo koordenasaun ho parseiru sira hodi halo kolesaun lixu. Atu implementa resiklajen ne’e depende ba Governu maibé agora daudaun ita munisípiu Dili hetan Kooperasaun ho parseiru sira-ne’ebé haree kestaun resiklajen hanesan Mecycorps, JICA, Banku Investimento Europeia, COICA. Tanba sira hakarak haree ba kestaun resiklajen maibé kona-ba implementasaun ita seidauk ko’alia,” nia dehan.
Diretór ne’e hateten, kuandu la halo estatejia resiklajen entaun ateru kontroladu uza la to’o tinan 10, maibé kuandu programa resiklajen laiha tinan 10 mós la to’o.
Jornalista : Osória Marques
Editór : Cancio Ximenes
