HASATIL rekomenda Governu foun investe iha agrikultura
DILI, 19 juñu 2023 (TATOLI)— Organizasaun Hametin Agrikultura Sustentável Timor Lorosae (HASATIL), rekomenda ba Governu atu investe iha agrikultura, turizmu no peska, hodi kontribui ba diversifikasaun fonte rendimentu.
Koordenadór Rede HASATIL, Gil Horácio Boavida, hateten Governu tenke uza rai sira-ne’e ba atividade agríkola no mós promove utilizasaun fini lokál ne’ebé bele adapta ba mudansa klimátika, nune’e bele garante produsaun lokál aumenta.
“Atu garante seguransa ai-han iha nivel Nasionál, ami-nia rekomendasaun ida mak promove no dezenvolve rai fertil ba atividade agríkola sira,” Gil Horacio Boavida hatene Agência Tatoli, iha nia kna’ar fatin iha Faról, segunda ne’e.
Nia subliña, importánsia atu adopta téknolojia apropriadu atu moderniza ekipamentu agrikultura no ho forma ida-ne’e, aumenta produsaun.
Gil Boavida preokupa kona-ba foinsa’e sira-nia interrese atu investe iha setór agrikultura maske nia rekoñese katak iha joven balun ne’ebé dedika aan ba Agrikultura.
Tuir rezultadu Sensu Agrikultura 2019 nian, iha rai ektare 509,226 ne’ebé korresponde ba totál área kultivasaun brutu, ne’ebé 18% de’it mak uza ba kultivasaun batar no 7.6% de’it ba produsaun foos.
Tuir dokumentu ne’e, aleinde produsaun agríkola batar no foos, agrikultór timoroan sira uza 7.4% de’it hosi área kultivasaun ba cassava (ai-farina) no 6.3% ba kafé.
Dadus sira-ne’e hatudu mós katak 67% hosi agrikultór sira halo rai ne’e ho konvensaun ho 63% uza forsa manuál no 33% uza mákina agrikultura.
Jornalista : Osória Marques
Editór : Cancio Ximenes
